Жамбыл ауданының Сұраншы батыр және Жайсаң ауылдарында екі бірдей жаңа денсаулық сақтау нысаны пайдалануға берілді. Жаңажылдық мерекеге орай шағын ауыл тұрғындарының қуанышы еселеніп, қос елдімекенде мерекелік көңіл-күй салтанат құрды.
Нысанның ашылуына облыс әкімінің бірінші орынбасары Қанат Есболатов, Жамбыл ауданының әкімі Нұрлан Ертас қатысып, тұрғындарды шалғай ауылдағы айтулы оқиғамен құттықтады. Сұраншы батыр ауылындағы фельдшерлік-акушерлік қосын (ФАП) тұрғындарды сапалы әрі қолжетімді медициналық қызметпен қамтамасыз ету мақсатында «Ауылдық денсаулық сақтауды жаңғырту» ұлттық жобасы аясында салынғанын айтты. ФАП жобасының құны – 288 миллион 284 мың теңге. Құрылыс жұмысы республикалық бюджет есебінен жүзеге асырылып,
оны «Техноснаб 2002» ЖШС сапалы орындап шыққан. Аудан әкімі биыл шалғай ауылдарда осындай 16 медициналық нысанның құрылысы жүргізіліп, шетінен пайдалануға беріліп жатқанын айтты. Бұл – ауыл тұрғындары үшін үлкен қуаныш әрі маңызды әлеуметтік жетістік екенін атап өтті.
Салтанатты сәтте құрылысты жүргізген мердігер ұйым «Техноснаб 2002» жауапкершілігі шектеулі серіктестігінің өкілі Бақыт Сәкенқызы медициналық қосын фельдшері Раушан Біткенбаеваға нысанның нышан кілтін тапсырды. Ауыл ақсақалы Ерболат ата көпшілікке ақ батасын беріп, әжелер шашу шашты. Лента қию рәсімін жасаған құрметті қонақтар ғимарат ішін аралап көрді. Талап ауылдық округінің орталығы – Сұраншы батыр ауылында 1820 адам тұрады. Жаңа фельдшерлік-акушерлік қосында күніне 15 адамға дейін қабылдауға мүмкіндік бар.
Аудан орталығынан шалғайдағы Жайсаң ауылының тұрғындары да дәл осындай қуанышқа кенелді. Сол күні онда дәрігерлік амбулатория есігін айқара ашты. Мұндағы салтанатты рәсімге де облыс әкімінің бірінші орынбасары Қанат Есболатов пен аудан әкімі Нұрлан Ертас қатысып, тұрғындар қуанышымен ортақтасты.
Бүгінде ауылдағы халық саны 2267 адамды құрайды. Бұған дейін медициналық қызмет ескі мектеп ғимаратында көрсетіліп келген болатын. Енді дәрігер мен фельдшер жаңа нысанда күніне 25 адамға дейін қабылдай алады. Ақсеңгір ауылдық округіне қарасты Жайсаң елдімекенінің тұрғындары енді емшара қабылдау үшін 50 шақырымдай Ұзынағашқа сабылмайтын болды. Қажет жағдайда өз ауылдарынан ашылған су жаңа емдеу орнында ем қабылдайды. Мемлекет ауыл халқына осындай жағдай жасағанына тұрғындар ризашылығын білдіріп, ауыл ақсақалы бата берді. Ақ жаулықты әжелер шашу шашып, жиналғандар мекеме ішін аралап көрді. Мұндағы жаңа нысан да заманауи медициналық құрал-жабдықтармен, инженерлік желілермен толық қамтамасыз етілген. Медицина қызметкерлеріне жұмыс істеуге өте ыңғайлы. Дәрігерлік амбулатория жобасының жалпы құны – 293 миллион 636 мың теңге.
Мемлекет басшысы денсаулық сақтау саласын дамыту – елдің әлеуметтік тұрақтылығы мен халықтың өмір сапасын арттырудың басты кепілі екенін атап өткен болатын. Әсіресе ауыл тұрғындары үшін сапалы әрі қолжетімді медициналық көмекті қамтамасыз ету – мемлекеттік саясаттың басым бағыттарының бірі. Жамбыл ауданында құрылысы аяқталып, пайдалануға беруге дайындалып жатқан осындай әлі бірнеше нысан бар. Бұл – мемлекет тарапынан ауыл халқының денсаулығын жақсартуға бағытталған нақты қамқорлықтың жарқын көрінісі.
Қос ауылдағы қуанышқа сондай-ақ облыстық, аудандық мәслихат депутаттары, ардагерлер ұйымының мүшелері, басқа да лауазым иелері қатысты.
Серік САТЫБАЛДИЕВ
Жамбыл ауданы
