Қонаев қаласының дамуында жол-көлік инфрақұрылымын жетілдіру мәселесі айрықша маңызға ие. Өйткені жолдардың кең, тегіс әрі сапалы болуы өңір экономикасының өркендеуіне, тұрғындардың өмір сапасына және азаматтардың қауіпсіздігіне тікелей әсер ететіні белгілі.
Бүгінде облыс орталығында жол инфрақұрылымы мен көлік саласын дамыту бойынша жүйелі жұмыс жүргізіліп жатыр. Қалалық әкімдіктің мәліметіне сүйенер болсақ, өткен жылы бірқатар ірі жоба басталып, кейбірі өз мәресіне жеткен. Оның ішінде «Көшпенділер қалашығына» дейін 6,8 шақырым жол салынған. Мұнда жол бойы толығымен жарықтандырылып, қалашықтың алдында автотұрақ жасалған. Ал «Қарлығаш» ықшамауданында 7,4 шақырым жол күрделі жөндеуден өтуде. Мұнда 8,5 шақырым жаяу жүргіншілер жолы салынып, аялдамалар орнатылаған. Сондай-ақ көше бойына жарық шамдар қойылған.
Қаланың кешенді даму жоспарына сәйкес, Шеңгелді ауылдық округі бойынша 29,2 шақырым жол жөнделген. Сонымен қоса, 520 дана жол белгісі, 14 жасанды жол дөңесі орнатылған. Қорыта айтқанда, облыс орталығында жол, қоғамдық көлік инфрақұрылымын дамыту бағытында атқарылып жатқан жұмыстар қаланың болашақ дамуына берік негіз қалыптастырып келеді.
Өз тілшіміз
Қонаев қаласы
