Қазақстан Республикасы Парламенті Мәжілісінің депутаты Максим Рожин, Алматы облысы Іле ауданы Асқар Тоқпанов ауылдық округіндегі Қазақстан Республикасы Қорғаныс министірлігінің Десанттық шабуылдаушы “16194 Әскери бөлімі” республикалық мемлекеттік мекемесінде болды. Халық қалаулысы бөлімдердің инфрақұрылымымен жан-жақты танысып, казарма, асхана, санитарлық-гигиеналық нысандарды аралап көрді.
Сапардың басты мақсаты – әскери қызметшілердің күнделікті қызметі мен тұрмыс жағдайын өз көздерімен көру, олардың ұсыныс-тілектері мен көтерген мәселелерін тыңдау болды. Кездесу барысында Максим Рожин сарбаздармен еркін форматта ашық әңгіме өткізіп, олардың әскери қызмет жайлы пікірін, ұсыныстарын және алдағы жоспарларын тыңдады. Жас жауынгерлер де өз кезегінде алғашқы әсерлерімен бөлісіп, туған-туыс пен қоғам алдындағы жауапкершілікті ерекше сезінетіндерін айтты.
Жеке құраммен кездесуде депутат елімізде қорғаныс саласына көрсетіліп жатқан мемлекеттік қолдау шараларын, сондай-ақ әскери қызметшілердің әлеуметтік жағдайын жақсартуға бағытталған заңнамалық бастамалар мен алдағы реформалар туралы сөз қозғады. Депутат осы проблемаларды шешуге заңнамалық деңгейде қолдау көрсету Парламенттің басым міндеттерінің бірі екенін атап өтті. Мәжіліс депутаты құқықтық тәртіп әскерлерінің мемлекеттік қауіпсіздікті қамтамасыз етудегі маңызды рөлін ерекше атап өтіп, офицерлер мен сарбаздарға қызметте сәттілік тіледі. Сапар соңында Мәжіліс депутаты әскери қызметшілерге адал қызметі мен жоғары тәртіп деңгейі үшін алғыс білдірді.
