Қарасай ауданының денсаулық сақтау саласындағы оң өзгерістер көңіл қуантады. Жуырда клиникалық көпсалалы орталық аудандық аурухананың ғимаратына күрделі жөндеу жұмыстары басталды. Сонымен қатар 500 адамға арналған емхана, заманауи перинаталдық орталық және бірқатар өзге де нысандардың құрылысы жоспарлануда. Бұл туралы аталған мекеменің директоры Бауыржан Сатыбалды қоғам өкілдерімен өткен кездесуде баяндады. Аталған жиын Қаскелең қаласындағы аудандық Мәдениет үйінде өтті.
Алдымен Бауыржан Нұрланұлы өзі басқарып отырған ұжымның атқарған жұмыстарына тоқталды. Мәселен, аудандағы 290 мың адам осы медициналық мекемеге тіркелген. Осыған байланысты аурухананың барлық құрылымдық бөлімшелеріне үлкен жүктеме түсіп отыр. 7000-нан астам ота жасалып, заманауи медициналық құрал-жабдықтар мен көлік сатып алынды, жасанды интеллектіні қолдану бағытында ауқымды жұмыстар жүргізілуде. «Жедел жәрдем» қызметі үшін жаңа автокөліктер алу және басқа да шаралар жоспарланған. Сондай-ақ ауданда 11 денсаулық сақтау нысанын салу көзделіп отыр. Барлығын бір жылда тұрғызу мүмкін болмағандықтан, құрылыс жұмыстары үш жыл ішінде кезең-кезеңімен жүзеге асырылмақ.
Атап айтқанда, Қаскелең қаласында 500 адамға арналған емхана, перинаталдық орталық, Көлащы ауылында 300 орынды дәрігерлік амбулатория, сондай-ақ Бекболат, Ұлан, Қайнар және Шалқар ауылдарында 50 емделушіге арналған амбулатория салу жоспарланған.
Баяндамашы 2026 жылы атқарылатын он бір негізгі бағытпен де таныстырды. Олардың қатарында аудандық аурухана ғимаратына күрделі жөндеу жүргізу, алғашқы медициналық-санитарлық көмектің «Мейірімді клиника» моделін енгізу, хирургия, травматология, урология салаларында аз инвазивті операцияларды дамыту жұмыстары да бар.
Бұдан бөлек, госпитальдық фармация, эндоскопия және эстетикалық хирургия бөлімдерін ашу көзделіп отыр. Автокөлік паркін жаңарту, шетелдік дәрігерлердің қатысуымен шеберлік сабақтарын өткізу, жоғары технология мен жасанды интеллект мүмкіндіктерін пайдалану арқылы медициналық қызметтің сапасы мен қолжетімділігін арттыру да – маңызды міндеттердің бірі.
1974 жылы салынған аурухана ғимаратына жүргізіліп жатқан күрделі жөндеу жұмыстары үш кезеңнен тұрады. Бірінші кезеңде аудандық емхана Үшқоңыр ауруханасының ғимаратына көшіріледі. Екінші кезеңде, мамыр-маусым айларында стационар да сол жерге ауыстырылады. Күрделі жөндеуді 2026 жылдың соңына дейін аяқтау жоспарлануда.
Осы мүмкіндікті пайдалана отырып, Бауыржан Нұрланұлы қоғам өкілдерінен, әсіресе ақсақалдар мен әжелерден тұрғындарға күрделі жөндеу жұмыстарына байланысты қалыптасқан жағдайды түсіндіріп, сабыр сақтауға, шыдамдылық танытып, болып жатқан өзгерістерге түсіністікпен қарауға шақыруды өтінді.
Кездесу барысында залдан сұрақтар мен ұсыныстар да айтылды. Райымбек ауылдық округі ардагерлер кеңесінің төрағасы Леміс Әбдікерімов бұрын Бұлақты ауылындағы бастауыш мектеп орналасқан жер телімінде медициналық мекеме ғимаратын салуды ұсынды. Сондай-ақ Жамбыл ауылдық округіне қарасты Қошмамбет ауылындағы мәселелер сөз болды. Мұндағы медициналық мекемеде су тапшылығы қатты сезілуде. Қызметкерлер суды жақын маңдағы мешіттен тасуға мәжбүр.
Қойылған сауалдардың барлығына Бауыржан Нұрланұлы жан-жақты жауап берді. Кездесу соңында ол қатысушыларды Жаңа жылмен құттықтап, баршаға денсаулық, бақыт және отбасылық амандық тіледі.
Қуат Қайранбаев
Қарасай ауданы
