Конституциялық реформаға қатысты алғашқы комиссия отырысының тікелей әфирде көрсетілуі – қоғамдағы ашықтық пен пен жариялылықты қамтамасыз ететін маңызды қадам болды. Бұл бастама ел тағдырына байланысты шешімдерге әр азаматтың бейжай қарамауына мүмкіндік берді деп ойлаймын. Отырыс барысында айтылған әрбір ұсынысты мұқият тыңдап, зерделеп отырдық. Өйткені Конституция – еліміздің негізгі төлқұжаты, мемлекеттігіміздің берік іргетасы.
Комиссия отырысында бірқатар маңызды ұсыныстар ортаға салынды. Соның ішінде Мәжіліс депутаты Елнұр Бейсенбаевтың отбасы мен неке институтын күшейтуге қатысты айтқан пікірі қоғамда кең қолдау тапты деп айтуға болады. Халық қалаулысы әке мен ананың бала тәрбиесіндегі рөлін заңдық тұрғыда нақты айқындайтын уақыттың жеткенін орынды көтерді. Бұл мәселе бүгінгі күннің ең өзекті тақырыптарының бірі екені жасырын емес.
«Отан отбасынан басталады» деген ұлағатты сөз бекер айтылмаған. Отбасы – қоғамның алтын діңгегі, ал ата-ана – сол шаңырақтың тірегі. Бүгінгі қоғамда отбасы құндылықтарының әлсіреуі, ажырасудың белең алуы, бала тәрбиесіндегі жауапкершіліктің босаңсуы бәрімізді алаңдатады. Мұндай жағдайда отбасы институтын нығайту мемлекет деңгейінде қолға алынуы тиіс маңызды міндет деп санаймыз.
Сондықтан Конституциялық реформа аясында отбасы мен неке мәселесіне басымдық берілуі – уақыт талабы. Аналар кеңесі бұл бағыттағы игі ұсыныстарды қолдайды және ел болашағы үшін жасалып жатқан әрбір оң өзгерістен үміт күтеді.
Гүлнар Жошыбаева,
Алматы облыстық Аналар кеңесінің төрағасы
