Ұлттық құрылтайдың V отырысында елдің саяси-әлеуметтік, экономикалық, рухани дамуына қатысты өзекті мәселелер көтерілді. Ел Президенті Қасым-Жомарт Тоқаев бірпалаталы Парламент құру және оны «Құрылтай» деп атау туралы ұсыныс айтып, осыған орай референдум өтетінін атап өтті. Бұл елдің басқару жүйесін тиімді етуге және саяси тұрақтылықты күшейтуге бағытталған маңызды қадам болмақ. Сонымен қатар Қазақстан халқы Ассамблеясы мен Ұлттық құрылтайды таратып, Халық кеңесін құру идеясы ұсынылды. Аталған бастама мемлекеттің халық пікіріне құлақ түріп, азаматтардың маңызды мәселелерде үн қосуына, қоғамдағы бірлік пен ынтымақты берік етуге мүмкіндік береді. Мәдениет пен өнер саласы да басты назарға алынып, мәдениет ошақтары, театр мен музей, кітапхана ісіндегі, кино саласындағы жетістіктер, маңызды міндеттер атап өтілді. Ұлттық рәміздерді дұрыс пайдалану жайы да сөз болды. Қасым-Жомарт Кемелұлы қоғамда резонанс тудырған Нұрай есімді бойжеткеннің мәселесін де тілге тиек етіп, әрбір азамат заң талаптарына бағыну керегін айтып, істі мұқият тексеруді тапсырды. Сондай-ақ Қазақстанның транзиттік әлеуетін толық пайдалану үшін жасалып жатқан жұмыстарды баяндап, олардың сапалы әрі уақытылы орындалуын бақылауда ұстайтынын мәлімдеді. Осылайша Ұлттық құрылтайдың V отырысы басқару жүйесінің тиімді моделін қалыптастыру, қоғам мен билік арасындағы байланысты күшейту, құқықтық тәртіпті сақтау, ұлттық нақыштарды ардақтау сынды өзекті тақырыптар талқыланған маңызды жиын болды.
Ерболат Тұрымбетов,
Алматы облыстық ардагерлер кеңесінің төрағасы
