Талғар ауданында тоғызқұмалақтан Алматы облысының жеке чемпионаты өтті. Жарысқа Алматы облысының аудандарынан 2012 жылы туған және одан үлкен жастағы шамамен 75 спортшы қатысты.
Турнир жеке есепте швейцариялық жүйе бойынша ұйымдастырылып, екі форматты қамтыды – «классика» және «блиц». Жарыстың негізгі мақсаттары: салауатты өмір салты мен зияткерлік спортты насихаттау; қазақстандық патриотизмді, ұлттық дәстүрлер мен мәдени мұраға құрметті қалыптастыру; қатысушылардың спорттық шеберлігін арттыру және облыстың ең мықты зияткер спортшыларын анықтау; 11 ақпанда Павлодар қаласында басталатын Қазақстан чемпионатына қатысатын Алматы облысының құрама командасына үміткерлерді іріктеу.
«Чемпионат ұйымдастырушылық және спорттық деңгейі жоғары жағдайда өтті. Жыл сайын бәсекенің артып, ойыншылардың ойыны анағұрлым кемелденіп, саналы бола түскені қуантады. Мұндай жарыстар спортшыларға құнды тәжірибе беріп, әрі қарай дамуға ынталандырады», – деді жарыстың бас төрешісі Ерболат Қылышбаев.
Бірнеше ойын күні бойы қатысушылар жоғары дайындық деңгейін, стратегиялық ойлау қабілетін және жылдам шешім қабылдай алу шеберлігін көрсетті. Әсіресе блиц партияларында зейін мен есептеу жылдамдығы алдыңғы орынға шықты.
Жарыс қорытындысы бойынша ерлер арасында «Классика» турнирінде:
1 орын – Оразбай Иманғали (Іле ауданы);
2 орын – Батыр Ернұр (Алатау қ.);
3 орын – Ахмет Нұрғыса (Ұйғыр ауданы);
3 орын – Балагаз Ислам (Жамбыл ауданы).
Ерлер арасындағы блиц турнирінің жеңімпаздары:
1 орын – Батыр Ернұр (Алатау қ.);
2 орын – Олжатаев Олжас (Қарасай ауданы);
3 орын – Есентай Арсен (Талғар ауданы);
3 орын – Молдахан Ақнұр (Алатау қ.).
«Әр партия оңай болған жоқ, қарсыластар өте мықты болды. Әсіресе қателікке жол беруге болмайтын блиц форматы қиынға соқты. Барлық жеңістерім – тынымсыз жаттығулар мен бапкерімнің қолдауының нәтижесі», – деді 15–17 жас аралығындағы мектеп оқушылары арасында тоғызқұмалақтан тұңғыш әлем чемпионы атанған Батыр Ернұр.
Әйелдер арасында «Классика» турнирінде:
1 орын – Хуатқызы Меруерт (Жамбыл ауданы);
2 орын – Хабанбай Інжу (Жамбыл ауданы);
3 орын – Даулетбек Томирис (Қарасай ауданы);
3 орын – Нұрболқызы Ақмаржан (Ұйғыр ауданы).
Әйелдер арасындағы блиц турнирінде:
1 орын – Даулетбек Томирис (Қарасай ауданы);
2 орын – Мақсатқызы Ақнұр (Жамбыл ауданы);
3 орын – Нұрболқызы Ақмаржан (Ұйғыр ауданы);
3 орын – Оңғарбай Ақниет (Ұйғыр ауданы).
