Мемлекет басшысы Қасым-Жомарт Тоқаев биыл да жыл басталысымен баспасөзге сұхбат берді. Ел президенті «Түркістан» газетіне берген сұхбатында өткен жылы қол жеткізген жеткізген жетістіктер мен алдағы жылдағы жоспарлар туралы кеңінен ой толғады. Сұхбатта ел дамуының қазіргі кезеңін айқын көрсетті. Сонымен қатар білімнің, оқу мәдениетінің және сапалы ақпараттың маңызы орынды көтерілді. Бұл — қоғамның саналы дамуы үшін аса қажет құндылықтар.
«Барлық аймаққа жекеменшік мектептердің, балабақшалардың, оқу орталықтары мен үйірмелердің жұмысын қамтамасыз ету үшін «жан басына сәйкес қаржыландыру» қағидаты бойынша қомақты қаражат бөлу міндеті жүктелген. Бұған қоса, ауқатты кәсіпкерлердің меншігіндегі және ата-аналары балалардың оқу ақысына көп ақша төлеп отырған элиталық мектептерге де бюджеттен қаржы бөлінеді» – дей келе, бұл саланы реформалау қажеттігін қадап айтты. Бұл саладағы бей-берекеттік салдарынан қаржының діттеген орнына жетпей жатқанын айтып, маңызды мәселенің шешімін шығару кезек күттірмейтін мәселе екенін сөз етті. Ел президенті сонымен қатар әлеуметтік сала ретінде күн санап дамып отырған медицина саласы туралы да толғамды ой айтты. Бұл саладығы кемшіліктер мен жеткен жетістіктерді де жіпке тізді. Басты байлық денсаулық екенін ескерген Қасым-Жомарт Кемелұлы бұл саланың да түзетуді қажет ететін тұстарын жасырмады.
Жалпы мемлекет басшысы бұл сұхбатында көптеген өзекті мәселенің шешімін табуы үшін реформа қажеттігін жасырмады. Әрі бұл мақсатта бар күшін салатынын да айтып өтті. Біз де мемлекет басшысының әр жоспарлы ісіне қолдау білдіреміз деп сендіреміз.
Бибігүл Абдилова,
Ұйғыр аудандық мәслихатының депутаты
