Қазақстан Жазушылар одағы Алматы облыстық филиалы атынан елімізде жүзеге асырылып жатқан конституциялық реформаларды толық қолдайтынымды білдіремін. Бұл – еліміздің құқықтық, демократиялық және зайырлы мемлекет ретінде дамуын жаңа сапалық деңгейге көтеретін маңызды тарихи қадам. Реформалардың өзегінде адам құқығы мен бостандығын қорғау, заң үстемдігін күшейту, азаматтық қоғамды нығайту мәселелері тұр. Зайырлылық қағидатының Конституцияда орнығуы қоғамдық келісімді, тұрақтылықты және рухани дамуды қамтамасыз ететін негізгі тірек болып қала береді. Сонымен қатар отбасының бірлігі мен берекесін сақтау, ынтымағын арттырып, татулығын нығайту ұлттық болмыс пен ел болашағын айқындайтын стратегиялық бағыт. Ана мен баланы қорғау, ұрпақ тәрбиесіне мемлекет пен қоғамның ортақ жауапкершілігін арттыру әлеуметтік тұрақтылық пен рухани жаңғырудың берік тірегі.
Қаламгерлер қауымы ретінде біз әділетті қоғам, жауапты мемлекет және саналы ұрпақ қалыптастыру жолындағы бұл реформаларды ел дамуына қызмет ететін маңызды бастама деп бағалаймыз. Конституциялық өзгерістер халық пен билік арасындағы сенімді нығайтып, Қазақстанның берік құқықтық мемлекет ретінде орнығуына жол ашады деп сенеміз. Конституциялық реформаларды қолдай отырып, барша азаматтарды ел бірлігі мен қоғамдық келісімді нығайту жолындағы ортақ іске үлес қосуға үндеймін.
Ержан Тоқтар,
Қазақстан Жазушылар одағы
Алматы облыстық филиалының төрағасы
