Қаскелең қаласында грек-рим күресінен жасөспірімдер арасында облыстық чемпионат өтті. Кіл мықтылар күш сынасқан сайысқа Балқаш аудандық балалар мен жасөспірімдер спорт мектебінің жас балуандары да қатысып, жүлдемен оралды.
Тартысқа толы бәсекеде Ақдала орта мектебінің балуаны Мадияр Бақтығалиұлы 45 келі салмақ дәрежесі бойынша жүлделі үшінші орынды еншілесе, М.Сеңгірбаев атындағы орта мектеп оқушысы Санат Арыстанбай 51 келі салмақ дәрежесінде чемпион атанды. Сонымен қатар Жиделі ауылының мақтанышы Айбын Байкенже 72 келі салмақта қарсыластарынан басым түсіп, алтыннан алқа тақты.
Балқаш өңірінде облыстық, республикалық спорттық сайыстарда үздік нәтижеге қол жеткізген спортшылар аз емес. Олардың әрбір жеңісі – біз үшін мақтаныш. Жас балуандар тыңғылықты дайындықтың арқасында аудан абыройын асқақтатып жүр. Ал бабы мен бағы жанған балуандарға бағыт-бағдар беріп, олардың жеңіс тұғырынан көрінуіне сүбелі үлес қосып жүрген жаттықтырушылар Фархад Мұсаев пен Бақнұр Арыстанбаевтың еңбектері ерен.
Жас балуандардың мұндай белестерді бағындыруы – үздіксіз еңбек пен ізденістің нәтижесі. Ерік-жігерін шыңдап, мақсатқа ұмтылған спортшылардың алда талай биіктерді бағындыратыны анық.
Бақтығали Дәуітбай
Балқаш ауданы
