6654 әскери бөлімінде Ауған соғысына қатысқан ардагерлермен патриоттық-тәрбиелік бағыттағы тағылымды кездесу ұйымдастырылды. Іс-шараның негізгі мақсаты – жас сарбаздардың бойына отансүйгіштік рух қалыптастыру, әскери қызметтің маңызын түсіндіру және ардагерлердің өмірлік тәжірибесін үлгі ету.
Кездесуге Қонаев қаласындағы «Ауған соғысы ардагерлері одағы» қоғамдық бірлестігінің төрағасы Молдабергенов Қанат Еренұлы, сондай-ақ ардагерлер Щербак Владимир және Карачачев Нуртай арнайы келіп қатысты. Қонақтар сарбаздармен ашық форматта сұхбаттасып, Ауған жеріндегі қызмет жолдары, жауынгерлік бауырластық, тәртіп пен төзімділік жайында мазмұнды әңгіме өрбітті.
Ардагерлер Отан алдындағы борышты абыроймен өтеудің маңызын атап өтіп, жас жауынгерлерді елге адал қызмет етуге, бірлік пен жауапкершілікті жоғары қоюға шақырды. Сарбаздар өздерін қызықтырған сұрақтарын қойып, ардагерлердің өмірлік тәжірибесінен рухани тағылым алды.
Іс-шара соңында әскери бөлім басшылығы қонақтарға алғыс білдіріп, мұндай кездесулердің жас ұрпақтың патриоттық санасын қалыптастыруда үлкен рөл атқаратынын атап өтті. Тағылымды жүздесу сарбаздардың Отанға деген сүйіспеншілігін арттырып, әскери қызметке деген жауапкершілігін нығайта түсті.
