Қонаев қаласының орталық алаңында ҚР Ұлттық ұланы 3660 әскери бөлімі жас сарбаздарының әскери ант беру рәсімі өтті. Салтанатты шараға Қызылорда, Түркістан, Жетісу облыстары мен Алматы, Шымкент қалаларынан келген 200-ден астам сарбаз, олардың ата-аналары және әскери сала ардагерлері қатысты.
– Отан алдында берілген антқа адал болу – үлкен абырой әрі зор жауапкершілік. Сіздердің жүректеріңізде елге деген сүйіспеншілік, патриотизм сияқты қасиеттер берік орнаған деп сенемін. Темірдей тәртіп, табандылық сіздерге серік болсын. Міндеттеріңізді мүлтіксіз атқарып, ата-аналарыңыздың үмітін ақтап, еліміздің мақтанышы болыңыздар, – деген ҚР Ұлттық ұланы «Оңтүстік» өңірлік қолбасшылығы қолбасшысының тәрбие және әлеуметтік-құқықтық жұмыстар жөніндегі орынбасары, полковник Атабек Салихбаев ант берушілердің алдағы қызметіне сәттілік тіледі.
Қатардағы Нұрдәулет Алтаевтың анасы Бану Бектенова: «Сарбаздарға ел сенімін ақтайтын, Отанымыздың ержүрек азаматы болуына, сағынышпен күтіп жүрген отбасыларына аман-есен оралуларын тілеймін. Әскерде алған тәлім-тәрбие, шыныққан жігер алдағы өмірлерінде де пайдасын тигізеді деген ойдамын», – деп жылы лебізін білдірді.
Жас сарбаз Азамат Бисенғалиев елге қызмет ету әрбір ер азаматтың борышы екенін айтып, қатарластарын осы маңызды міндеттен жалтармай, әскери қызметін өтеуге шақырды. Сарбаздар алдағы уақытта құқықбұзушылықтың алдын алып, еліміздің тыныштығын күзетеді.
Гүлзат БАЙҚОНЫС
Қонаев қаласы
