Жамбыл Жабаевтың әдеби-мемориалды музейінің мәжіліс залында жаңа Конституцияның жобасы талқыланды. Шараға Жамбыл ауданы әкімдігі мен музей қызметкерлері, зиялы қауым өкілдері және ауыл тұрғындары қатысты.
Жиынды жүргізген Жамбыл ауданы әкімінің орынбасары Әділбек Қамбарұлы Конституциялық реформаға байланысты болып жатқан өзгерістерге шолу жасады. Өткен жылы Мемлекет басшысының саяси жүйені жаңғырту, Конституцияны қайта қарау бастамасын көтеруі – мемлекетті халыққа жақындату, әділдік орнату үшін жасалып жатқан қадам екенін атап өтті. Осыған байланысты арнайы жұмыс тобы құрылып, ғалымдар, заңгерлер, қоғам белсенділері мен партия өкілдері бірлесе жұмыс істеді. Бұдан қарапайым халық та шет қалмай, ой-пікірлері мен ұсыныстарын білдірді. Нәтижесінде жаңа Ата Заңның жобасы дайындалғанын айтты.
– Жаңа Конституцияның басты мәні – адам және оның құқығы. Онда адамның өмірі, еркіндігі, ар-намысы мемлекеттің ең басты құндылығы екені нақты жазылды. Заң бәріне бірдей болуы тиіс деген қағида күшейтілді. Ел тәуелсіздігі, жердің тұтастығы, халықтың бірлігі өзгермейтін басты құндылықтар ретінде бекітілді. Сонымен қатар әділдік, заңға бағыну, табиғатты қорғау сияқты ұғымдар алғаш рет Ата Заң деңгейінде көрсетілді. Бұл Конституция білімге, ғылымға, жастарға ерекше мән береді. Елдің болашағы жер асты байлығында емес, білімді, саналы ұрпақта екені айқын жазылған. Цифрлық технология дамыған заманда ғаламтордағы құқықтарымыз да заңмен қорғалатын болады, – деген Әділбек Қамбарұлы құжаттағы негізгі ерекшеліктерге тоқталып, көпшілікті жобаны талқылауға белсенді қатысуға шақырды.
Жамбыл музейінің ғылыми қызметкері Нәзира Ермекқызы өз сөзінде жаңа Ата Заңның басты мәні мен маңызын тілге тиек етті. Талқылауға ҚР Мәдениет қайраткері, облыс пен ауданның Құрметті азаматы, белгілі қаламгер Күмісжан Байжан, аудандық білім бөлімінің басшысы Светлана Алтынбекова, аталған музейдің меңгерушісі Салтанат Жамбылова, қосымша білім беру мекемелерінің басшылары қатысты.
Серік САТЫБАЛДИЕВ
Жамбыл ауданы
