Бүгін Алматы қаласында Премьер-Министрдің орынбасары – Мәдениет және ақпарат министрі, Конституциялық реформалар жөніндегі комиссия төрағасының орынбасары Аида Балаеваның жетекшілігімен аталған коалиция мүшелері мен ғылыми қауымдастық өкілдерінің кездесуі өтті.
Кездесуге сондай-ақ Қазақстан Республикасы Ғылым және жоғары білім министрі Саясат Нұрбек, Қазақстан Республикасының Ұлттық ғылым академиясы президенті Акылбек Күрішбаев, Әл-Фараби атындағы Қазақ ұлттық университеті ректоры Жансейіт Түймебаев, Абай атындағы Қазақ ұлттық педагогикалық университеті ректоры Тлеп Болат, сондай-ақ Қазақстан Республикасы Президентінің жанындағы Ұлттық ғылым академиясының академигі Вячеслав Локшин қатысты.
Кездесу барысында Аида Балаева елімізде жүзеге асырылып жатқан конституциялық реформаның маңызына кеңінен тоқталып, Мемлекет басшысы Қасым-Жомарт Тоқаев бастамашылық еткен өзгерістер әділетті, тұрақты әрі тиімді мемлекеттік басқару жүйесін қалыптастыруға бағытталғанын атап өтті. Ауқымды реформалар топтамасының маңызды бағыттарының бірі – бір палаталы Парламентке көшу болып отыр.
Коалиция мүшесі ретінде Аида Балаева мемлекет мәдени әралуандықты сақтау мен дамытуға, ғылыми зерттеулерді қолдауға және білімге негізделген дамуға стратегиялық басымдық беріп отырғанын айтты.
«Бұл нормалар ұлттық мәдениетті сақтап, оны жаңғыртуға, прогрессивті ұлт қалыптастыруға, сондай-ақ ғылым мен инновацияның дамуына берік құқықтық негіз болады деп сенемін», – деді ол.
Сонымен қатар кездесуде Қазақстан Республикасы Президентінің жанындағы Ұлттық ғылым академиясының вице-президенті Асқар Жұмаділдаев, жас ғалым, Әл-Фараби атындағы Қазақ ұлттық университетінің Ғылым департаментінің директоры Қуаныш Тастамбек және басқа да қатысушылар сөз сөйлеп, Конституция жобасының негізгі ережелері жөнінде өз пікірлерін білдірді. Олар ғылыми қауымдастықты еліміздің болашақ құқықтық негізін қалыптастыруға белсенді атсалысуға шақырды.
– Өздеріңіз білесіздер, жуырда Мемлекет басшысы жаңа Конституция жобасын ұсынды. Бұл құжат бір ғана адамның емес, мол тәжірибесі бар 130 сарапшының ұзақ әрі мұқият жұмысының, сондай-ақ кең қоғамдық талқылаудың нәтижесі болып табылады. Комиссияға келіп түскен 10 мыңнан астам ұсыныс – осы жұмыстың нақты дәлелі, – деп атап өтті Тлеп Болат.
Айта кетейік, жаңа Конституция жобасы Мемлекет басшысына ұсынылды және ол 2026 жылғы 15 наурызда өтетін республикалық референдум арқылы халықпен бірлесіп қабылданатын болады.
