«Әділетті және прогрессивті Қазақстанның халықтық Конституциясы үшін!» жалпыұлттық коалициясының Жамбыл ауданындағы өкілдері ауыл-ауылды аралап, жұртшылықпен кең форматта кездесулер өткізуде.
Коалиция мүшелері Ықылас Амалбек, Аманқос Ақылдосұлы, Алипаша Чумаев және Райхан Жәнібекова аудан орталығынан шалғайдағы Айдарлы ауылына барды. Тұрғындармен кездесуде олар Конституциялық реформаның дайындалу кезеңдері мен мазмұны туралы кеңінен ақпарат берді. Спикерлер конституциялық өзгерістердің кезең-кезеңмен әзірленгенін, 130 сарапшыдан тұратын Конституциялық комиссия жұмыс істегенін және 10 мыңнан астам ұсыныс қаралғанын айтты. Осыған байланысты елде болып жатқан қоғамдық талқылаудың ерекше маңызға ие, ал тұрғындардың өз кезегінде референдумға қатысуы – азаматтық жауапкершілік екенін атап өтті.
«Бұл құжат тар шеңберде дайындалған жоқ. Ұсыныстар арнайы порталдар арқылы қабылданып, комиссия отырыстарында қаралды. Әрбір бап сарапшылар сүзгісінен өтті. Сондықтан жаңа Конституция – қоғамның кең қатысуымен қалыптасқан құқықтық келісім. 15 наурыздағы референдум – сол келісімді халықтың тікелей бекіту кезеңі», – деді «Әділетті және прогрессивті Қазақстанның халықтық Конституциясы үшін!» жалпыұлттық коалициясының Жамбыл ауданындағы өкілі Райхан Жәнібекова.
Серік САТЫБАЛДИЕВ,
Жамбыл ауданы
