Астана қаласында өткен «Зерде» ғылыми-зерттеу байқауының республикалық кезеңінде Қонаев қаласына қарасты Шеңгелді ауылындағы №6 орта мектептің 6-сынып оқушысы Әлия Қайрат 1-орынды иеленіп, облыс абыройын асқақтатты.
Ізденімпаз, жаңашылдыққа жаны құштар, жоғары жетістіктерімен көзге түсіп жүрген Әлия 3-сыныптан бастап түрлі білім бәйгелерінде бағын сынай бастаған. Оның бағындырған белестері мен қол жеткізген жетістіктеріне бастауыштағы сынып жетекшісі болған Эльмира Қожемқұлованың себепкер болғанын атап өткен жөн. «Бұлақ көрсең, көзін аш» дегендей, шәкіртінің бойындағы ерекше қабілетті аңғарған ол Әлияны ізденіске жетелеп, білімге деген қызығушылығын арттырып, биік белестерге нық қадам басуына жол ашып берген.
Ол «Зерде» зерттеу жобалары байқауының қалалық кезеңінде үш жыл қатарынан топ жарып, облыстық кезеңде екі мәрте жеңімпаз атанып, бір рет жүлдегер болды. 4-сыныпта осы байқаудың республикалық кезеңінде үшінші орынға ие болса, 5-сыныпта облыстық кезеңде үшінші орын алуына байланысты республикаға жолдама ала алмай қалды. Алайда оған сағы сынбаған Әлия дайындығын пысықтап, биыл республикалық байқауда 1-орынды жеңіп алып, өзінің білімділігі мен ізденімпаздығын тағы бір мәрте дәлелдеді. Осы жетістіктері үшін Қонаев қаласы әкімі мен қалалық білім бөлімінің Алғыс хаттарымен марапатталды.
Бала кезінен хореографиямен айналысатын Әлия Сәбитқызын жан-жақты қырынан тануға болады. Ол арнайы ағылшын тілі курсын аяқтап, білімін шыңдай түсті. Пәндік олимпиадаларда, әсіресе ағылшын тілі пәнінен түрлі сайыстарға қатысып, жүлделі орындарды еншілеп жүр. Сурет салумен де шұғылданады. Сонымен қатар ақын-жазушылардың шығармаларын мәнерлеп оқу сайыстарына қатысып, жүлделі орындарға ие болды. Осындай жан-жақтылығы мен талпынысы оның дарынды әрі еңбекқор тұлға екенін айқындай түседі.
– Әлияның әр жетістігі – ұстаздарының бағыт-бағдары мен отбасы қолдауының, өзінің тынымсыз еңбегінің жемісі деп білемін. Оның алдағы уақытта да білім додаларында биік белестерді бағындыратынына сенімім мол. Алғашқы ұстазы Эльмира Қожемқұлова шәкіртінің бойындағы талпынысты байқап, бағыт-бағдар беріп, сенім ұялатты. Ұстазының қолдауы мен тынымсыз еңбегінің арқасында Әлия алғашқы қатысқан білім сайысында-ақ жоғары нәтиже көрсетіп, өзіне деген сенімін нығайтты. Сол алғашқы қаланған іргетасты одан әрі дамытып, шәкіртінің қабілетін шыңдап келе жатқан қазіргі жетекшісі – Юлтузай Алмахунова. Өз ісіне жауапкершілікпен қарайтын ұстаз әр баланың бойындағы дарынды дәл аңғарып, оны дамытуға ерекше мән береді. Әлияның да білімге деген құштарлығын оятып, ғылыми жобалар мен пәндік олимпиадаларға қатысуына жол ашты. Ұстаздың жүйелі дайындауы мен кәсіби шеберлігінің арқасында қызым республикалық деңгейде жоғары нәтижелерге қол жеткізіп отыр, – дейді Әлияның анасы Самал Жанғатаева.
– Республикалық ғылыми сайыстарда өзіндік қолтаңбасын қалыптастырып келе жатқан шәкіртім Әлия Сәбитқызы зерттеу жұмысына кездейсоқ қадам басқан жоқ. Ол білімге құштарлығы мен ізденіске деген табиғи бейімділігінің арқасында бұл бағытты саналы түрде таңдады. Әрбір ғылыми жобасына тыңғылықты дайындалып, тақырыптың өзектілігін айқындаудан бастап теориялық негізін жүйелеуге, тәжірибелік бөлімін сауатты ұйымдастыруға дейінгі барлық кезеңге үлкен жауапкершілікпен қарайды. Оның басты ерекшелігінің бірі – сыни тұрғыдан ойлай білуі. Кез келген ақпаратты дайын күйінде қабылдамай, дереккөздерді салыстырып, саралап, ғылыми тұжырым жасауға талпынады. Жұмыс барысында ғылыми стильді сақтап, ойын нақты әрі дәлелді жеткізе біледі. Талдау жасау қабілеті, мәселені кешенді түрде қарастыруы және логикалық пайымдауы оның зерттеу еңбектерінің сапасын арттырып келеді, – деген жетекшісі Юлтузай Алмахунова шәкіртінің жетістігін отбасынан алған тәрбиесінің, ұстаздары мен мектеп ұжымының қолдауының нәтижесі деп есептейді.
Еліміздің жарқын болашағы білімге құштар, бәсекеге қабілетті жастардың қолында. Білім мен ғылымның жолына бет бұрған оқушылардың қатары көп болғаны көңіл қуантады. Біз де Әлия Қайраттың арманына жетіп, тек жетістіктерімен қуантып, биік шыңдардан көріне беруіне тілектестігімізді білдіреміз.
Айжарық КӨПТІЛЕУОВ
