КОАЛИЦИЯ МҮШЕЛЕРІ СПОРТ САЛАСЫНЫҢ МАМАНДАРЫМЕН КЕЗДЕСТ
Іле ауданы Өтеген батыр ауылында «Әділетті және Прогрессивті Қазақстанның Халықтық Конституциясы үшін!» атты жалпыұлттық коалиция өкілдерінің тұрғындармен кездесулері жүйелі түрде өтіп жатыр. Осы ретте коалиция мүшелері аудан орталығындағы спорт мектебінің ұжымымен кездесті.
Жиын барысында Алмасбек Қожабекұлы бастаған жұмысшы топ Конституцияның жаңа жобасының негізгі бағыттарын таныстырып, алдағы референдумға белсенді түрде қатысуға шақырды. Оның айтуынша, жаңа Ата заң жобасының басты артықшылықтарының бірі – мәтінінің қарапайым әрі көпшілікке түсінікті тілде жазылуы.
– Бұрын Конституцияның кейбір баптарын кез келген адам бірден түсіне бермейтін. Ал жаңа жобада құқықтық нормалар барынша нақты, ашық әрі түсінікті берілген. Ең бастысы – адам құқықтарына бұрынғыдан да жоғары мән беріліп отыр. Бұл құқықтық дауларды әділ әрі дәл шешуге мүмкіндік береді, – деді.
Өз кезегінде коалиция мүшелері жаңа Конституция жобасы еліміздің түрлі саласындағы ең білікті 130 маманның қатысуымен дайындалғанын атап өтті. Оның сөзінше, құжатты әзірлеуге заңгерлер, саясаткерлер, сарапшылар және белсенді азаматтар атсалысқан.
– Жоба дайындалу барысында халықтан 10 мыңнан астам ұсыныс пен пікір жиналды. Мамандар сол ойларды зерделеп, бүгінгі заман талаптарына сай, ел дамуына серпін беретін жаңа Ата заң нұсқасын ұсынып отыр. Мен өзім құжатпен толық танысып, көптеген оң өзгерістерге көз жеткіздім. Сондықтан сіздерді де бейжай қалмай, өз таңдауларыңызды жасауға шақырамын. Бұл – тек бүгінгі күннің емес, болашақ ұрпақ алдындағы да жауапкершілік, – деді депутат.
Сонымен қатар, жиын барысында коалиция мүшелері азаматтар өз ұсыныс-пікірлерін eGov.kz электронды порталы арқылы жолдай алатынын түсіндірді. Сұрақ-жауап бөлімінде қатысушылар өздерін толғандырған мәселелерді ортаға салып, нақты жауаптар алды.
Жиын соңында спорт мектебінің ұжымы алдағы референдумға белсенді қатысуға дайын екендерін білдіріп, ел болашағына қатысты маңызды шешімге жауапкершілікпен қарайтындарын атап өтті.
