Конституциялық реформаның маңызды жаңалықтарының бірі – экономикалық және институционалдық дамудың арнайы құқықтық режимдерін Негізгі заң деңгейінде бекіту. Бұл норма елдің экономикалық саясатына жаңа серпін беріп, заманауи басқару құралдарын қолдануға құқықтық негіз қалыптастырады.
Жаңартылған Конституцияда Халықаралық қаржы орталығының және «жедел дамитын қалалар» режимінің қызмет етуіне құқықтық база жасалады. Мұндай тәсіл бір жағынан инвестициялық тартымдылықты арттырса, екінші жағынан елдің біртұтас құқықтық кеңістігін сақтауға мүмкіндік береді.
Арнайы режимдердің енгізілуі — құқықтық жүйеден бөлек шығу емес, керісінше, оның ішіндегі икемді құрал. Экономикалық белсенді аймақтарға қосымша реттеу тетіктерін беру жаңа технологияларды, капиталды және халықаралық тәжірибені тартуға жағдай жасайды. Бұл, әсіресе, қаржы, инновация және урбанистика салаларында маңызды.
Сонымен қатар Конституция бірыңғай мемлекеттік құқықтық кеңістіктің сақталуын нақты бекітеді. Яғни арнайы режимдер елдің құқықтық тұтастығын бұзбайды, тек даму қарқынын жеделдететін ерекше тетіктер ретінде әрекет етеді.
Мемлекет үшін бұл – бәсекеге қабілеттілікті арттыру құралы. Өңірлер үшін – экономикалық өсу мүмкіндігі. Ал азаматтар үшін – жаңа жұмыс орындары мен заманауи инфрақұрылым.
Осылайша арнайы құқықтық режимдерді конституциялық деңгейде бекіту елдің экономикалық жаңғыруын құқықтық тұрақтылықпен үйлестіретін теңгерімді модель қалыптастырады.
Саурбаева Риза,
Алатау қаласы қоғамдық кеңесінің төрағасы
