«Әділетті және прогрессивті Қазақстанның халықтық Конституциясы үшін!» коалициясының мүшелері Есік қаласындағы Райымбек батыр орта мектебінің педагогикалық ұжымымен кездесті. Басқосуда білім беру саласының қызметкерлерімен бірге 15 наурызда өтетін республикалық референдумға шығарылған жаңа Конституция жобасының негізгі ережелері талқыланды.
Кездесу барысында коалиция мүшелері жаңа редакцияда Президент бір реттік жетіжылдық мерзімге сайланатынын және қайта сайлану құқығына ие болмайтынын, өкілеттік кезеңінде саяси партия мүшесі бола алмайтынын атап өтті. Сонымен қатар жақын туыстарының саяси мемлекеттік қызметтерді атқара алмауы биліктің шоғырлануына жол бермейтін құқықтық тосқауыл екені түсіндірілді.
«Жаңа Конституция жобасының басты мақсаты – билікті жеке тұлғаға бейімдеу емес, оны институционалдық тұрғыдан шектеу. Бір реттік жетіжылдық мерзім өзгертілмейтін қағида ретінде бекітіледі. Бұл – биліктің «нөлденуіне» емес, тұрақтылық пен әділеттілікке бағытталған нақты құқықтық шешім. Сонымен қатар кадрлық шешімдерді Құрылтай келісімімен қабылдау тетігі енгізіліп отыр. Бұл – тепе-теңдік пен жауапкершілік моделінің негізі», – деді коалиция мүшесі Бағдат Рахымов.
Ұжым өкілдері референдумның ел дамуы үшін тарихи маңызы бар екенін атап өтті.
Айнур Дөненбаева,
«AMANAT» партиясы Еңбекшіқазақ аудандық филиалының консультанты
