Мемлекет басшысының ерікті және өтеусіз донорлықты дамыту жөніндегі тапсырмасын іске асыру аясында ҚР Денсаулық сақтау министрлігі биылғы ақпан айын қан донорлығы айы деп жариялады. Осы акция шеңберінде Қаскелең қаласында орналасқан облыстық қан орталығының жұмысымен таныстық.
Орталық директоры Азамат Заировтың айтуынша, мұнда күн сайын орта есеппен жүзге жуық адам қан тапсыруға келеді. Алайда әрбір адам донор бола алмайды. Ең алдымен, жас шектеуі 18-ден 60 жасқа дейін деп белгіленген. Сонымен қатар донорда созылмалы аурулар болмауы тиіс. Бұдан бөлек, қан тапсырар алдында майлы және қуырылған тағам мен дәрі-дәрмек қолдануға болмайды, екі тәулік бұрын алкогольден бас тарту қажет.
Алдымен донор тіркеу бөліміне жүгініп, тиісті сауалнаманы толтырады. Кейін терапевтің алғашқы тексеруінен өтеді, сынамалар бастапқы зертханаға жіберіліп, қан талдауы жасалады. Барлық көрсеткіштер сәйкес келген жағдайда ғана донор қан тапсыру залына жіберіледі. Донордан алынған қан жұқпалы ауруларға тексеріледі. Қанның құюға жарамды екені анықталғаннан кейін ғана ол медициналық мекемелерге жөнелтіледі.
Біз кейбір донорлармен де тілдесіп үлгердік. Мәселен, Қанат Ерғалиев – тәжірибелі донор болса, Исламжан Амреджанов бұл орталыққа алғаш рет келуі екен. Оның айтуынша, қан тапсыру мүлде қорқынышты емес, керісінше пайдалы әрі қайырымды іс.
Айта кетейік, 2025 жылдың қорытындысы бойынша қан орталығы облыстағы 16 медициналық мекемені 21 мың доза қан және оның компоненттерімен қамтамасыз еткен. Донорлықты дамыту бойынша тиісті Жол картасы жүзеге асырылуда. Соған сәйкес қан алу жұмыстары көшпелі түрде де ұйымдастырылады, оның ішінде Алматы облысының әскери бөлімдерімен, SDU University және басқа да мекемелермен бірлесіп өткізіледі.
Ерікті қан донорлығы – жоғары азаматтық жауапкершіліктің көрінісі екенін еске салғымыз келеді. Бір донордың үш адамның өмірін құтқара алатынын ескерсек, Қарасай ауданының тұрғындарын қан донорлығы айлығына белсенді қатысуға, сондай-ақ ерікті және өтеусіз донорлықты дамытуға атсалысуға шақырамыз!
Қуат Қайранбаев
Қарасай ауданы
