2025 жылдың тамыз айынан бастап Қарасай ауданы Елтай ауылдық округіне қарасты Көкөзек ауылында «Burunday Container Terminal (BCT)» компаниясының көпфункционалды контейнерлік терминалы жұмыс істеп келеді. Компанияны Пулат Хаитов басқарады. Бұл жоба отандық логистиканы дамытуға қосылған елеулі үлес десе де болды.
Жаңа логистикалық кешеннің жұмысы туралы кәсіпорынның техникалық директоры Арман Оразбаев пен операциялық директоры Асқар Жұмаділов әңгімелеп берді. Олардың айтуынша, жобаның жалпы құны 10 млрд теңгені құрайды, оның 80%-ы – несиелік қаражат. Құрылыс жұмысы 2024 жылдың шілде айында басталып, бір жылдан сәл астам уақыт ішінде аяқталған.
Жер телімінің жалпы аумағы – 16,5 гектар. Ал ғимараттардың аумағы – 50 мың шаршы метр. Оның ішінде 2 500 шаршы метрі уақытша сақтау қоймасына бөлінген. Түнгі уақытта кешен аумағы прожекторлармен жарықтандырылады. Бұл контейнерлік терминалдың тәулік бойы жұмыс істеуіне мүмкіндік береді.
Кешен құрылымына жабық және ашық қоймалар, 1 200 шаршы метрді құрайтын әкімшілік және кеңсе ғимараттары, жүк көліктеріне арналған автотұрақ, бақылау-өткізу пункті және өзге де нысандар кіреді. Сонымен қатар бұл кешен аумағында кедендік бақылаудан өтуі тиіс жүктер сақталады. «Кедендік рәсімдеуден» кейін, яғни Қазақстанға әкелінетін тауарларды ресми түрде тіркеу, құжаттарды тексеру, салықтар мен алымдарды төлеу аяқталған соң, олар белгіленген мекенжайларға жөнелтіледі. Бұл мультимодальды кешен болғандықтан, тұтынушылар өз жүктерін тәулік бойы онлайн режимде арнайы ашылған жеке кабинеттері арқылы бақылай алады.
Жаңа терминалда қажетті қызметтердің толық көлемі көрсетіледі. Оның жылдық өткізу қабілеті шамамен 100 000 TEU-ды құрайды. Терминал Қытайдан, сондай-ақ жақын және алыс шетелдерден келетін импорттық жүктерді қабылдау мен өңдеуге бағытталған. Теміржолға және Үлкен Алматы айналма автожолына жақын орналасуы да маңызды рөл атқарады.
Терминал заманауи басқару жүйесімен, жоғары технологиялық жабдықтармен және сенімді техникамен жабдықталған. Атап айтқанда, швед өндірісіндегі Kalmar маркалы екі жаңа тиегіш бар. Олар көтеру және тасымалдау жұмыстары кезінде таптырмас көмекші болып, салмағы 1,25 тоннадан 72 тоннаға дейінгі жүктерді көтере алады.
– Кешенді салу кезінде жоғары сапалы бетон қабатының қалыңдығы 35 см болды, – деп толықтырды Арман Оразбаев. – Бұл оның сапасына, беріктігіне және ылғалға төзімділігіне кепілдік береді. Сонымен қатар гидрооқшаулауға ерекше көңіл бөлінді. Дәл осы қорғаныш қабаттары су өткібеуді қамтамасыз етеді.
Осылайша, «Burunday Container Terminal» бизнес, сауда және өзара тиімді әріптестікті дамыту үшін үлкен мүмкіндік ашып отыр. Бұл ауқымды инфрақұрылымдық жоба аудан мен облыстың логистикалық инфрақұрылымын едәуір жақсарта түспек. Қазіргі таңда мұнда 30 адам еңбек етуде. Нысан толық пайдалануға берілгеннен кейін 70 жаңа жұмыс орны ашылмақшы. Жобаның екінші кезеңін 2026 жылы аяқтау жоспарланып отыр.
Қуат ҚАЙРАНБАЕВ
Қарасай ауданы
