Облыс әкімінің бірінші орынбасары Қанат Есболатов әскерге шақырылушылардың облыстық жиын пунктіне барып, тыныс-тіршілігімен танысты. Қанат Болатұлы медициналық комиссия құрамы отыратын бөлмелерді аралап, асхананы, жатын орындарды көріп шықты. Ұжым қызметкерлерімен дидарласып, ұсыныс-пікірлерін тыңдады. Облыс әкімінің бірінші орынбасары одан кейін Қонаев қалалық қазақ орта мектеп-лицейінде былтырғы әскери қызметке шақыру қорытындысы мен биыл көктемгі шақыруға тапсырыс беру мәселесіне арналған жиын өткізді.
Басқосуды ашқан облыс әкімінің бірінші орынбасары Қанат Есболатов былтыр мерзімді әскери қызметке шақыру аймақ басшысының қаулысына сәйкес ұйымдастырылып, толық көлемде орындалғанын атап өтті.
Алғашқы сөз кезегін алған облыстық қорғаныс істері жөніндегі департамент бастығының орынбасары – әскерге шақыру және әскерден тыс жұмыс басқармасының бастығы, полковник Дулат Акишев былтыр күзде азаматтарды Қарулы Күштер және басқа да әскери құрылымдарға мерзімді әскери қызметке шақыру барысында анықталған өзекті мәселелер жөнінде сөз қозғады.
Дулат Жұмабекұлының айтуынша, былтыр күзде ҰҚК Шекара қызметі қатарына мерзімді әскери қызметке шақырылған Балқаш ауданынан 3, Еңбекшіқазақтан 14, Жамбылдан 7, Іле ауданы мен Алатау қаласынан 8, Қонаевтан 11, Қарасайдан 5, Кеген-Райымбек аудандарынан 1, Талғардан 3, Ұйғыр ауданынан 5 азамат облыстық медициналық комиссияның қорытындысына сәйкес жарамсыз болып танылған. Алайда олардың барлығы аудандық медициналық комиссиядан өткенде жарамды болған. Мұндай жарамсыздық санаты Мемлекеттік күзет қызметінің, Қарулы Күштер, Төтенше жағдайлар министрлігінің, Ұлттық ұланның қатарына мерзімді әскери қызметке шақырылушылар арасында да анықталып отыр.
Департамент басшысының орынбасары былтыр күзде азаматтарды Қазақстан Республикасының Қарулы Күштеріне, әскери құрылымдарға мерзімді әскери қызметке шақыру қорытындысында Қонаев қаласы, Қарасай, Еңбекшіқазақ, Талғар, Балқаш аудандарының, Іле ауданы мен Алатау қаласының қорғаныс істері жөніндегі бөлімдерінің жұмысын жоғары бағалады. Сондай-ақ Кеген-Райымбек және Ұйғыр аудандарының қорғаныс істері жөніндегі бөлімдері тарапынан жоспар орындалмағынын жеткізді. Кеген мен Райымбек аудандары жастарының тіркеуден шықпай, өзге қалаларда жұмыс істеп жүргендігі әскерге шақыру барысында қиындық тудырып отырғанын алға тартты. Ұйғыр ауданында ондай мәселе болмаса да, жоспар орындалмай отырғанын тілге тиек еткен Дулат Жұмабекұлы бұл ауданда әскерге жарамсыз болған азаматтың төтенше жағдай, полиция және тағы сол секілді салада қызметке орналасқан кезде денсаулығының жарамды болып шыға келетініне таңданысын жасыра алмады.
Келесі кезекте денсаулық сақтау басқармасы басшысының орынбасары Гүлнар Жүнісова, Ұлттық қауіпсіздік комитеті Шекара қызметінің өкілі, полковник Ербол Назарбекұлы, Ұлттық ұланының өкілі, подполковник Есбол Ержақып сөз алып, әскерге шақыру барысында кездесетін түйткілді мәселелер жайлы мәлімдеді.
Жиын соңында қатысушылар тарапынан қойылған сауалдарға жан-жақты жауап берген Қанат Болатұлы аудандық медициналық комиссия қорытындысына сәйкес әскерге жарамды болған азаматты облыстық комиссияның жарамсыз деген шешімімен келіспеген жағдайда республикалық тексеріс ұйымдастыратынын жеткізді. Денсаулығы жарамайтын шақырылушы әскер қатарына алынған жағдайда сырқаты сыр беріп, оның салдары адам өліміне апарып соқтыруы мүмкін екенін, сондықтан медициналық комиссияларды салғырттыққа салынбауға шақырды. Сонымен қатар аудандық шақыру комиссияларының төрағаларына азаматтарды биыл көктемде Қарулы Күштердің, басқа да әскери құрылымдар қатарына мерзімді әскери қызметке шақыру үшін нарядты орындау жөніндегі жұмыстарын ұйымдастыруға және шақыру кезеңінде мерзімдері мен сапасына теріс әсер ететін барлық түйткілді мәселені жоюға тапсырма берді. Көктемгі мерзімді әскери қызметке шақырудан жалтарған азаматтарды іздестіру жұмысын жүргізуге көмек көрсету мәселесі бойынша аудандағы полиция басқармаларына облыстық полиция департаменті басшысының тапсырма беретінін жеткізді.
Айжарық КӨПТІЛЕУОВ
