Қазақстан Республикасы Ұлттық ұланының 6654 әскери бөлімінде мемлекеттік тілдің мәртебесін арттыруға бағытталған тағылымды әрі мазмұнды іс шара өтті. “Мемлекеттік тіл – менің тілім” атты байқау өзге ұлт өкілдері арасында ұйымдастырылып, әскери қызметшілердің қазақ тіліне деген құрметі мен қызығушылығын айқын көрсетті.
Бұл сайыс жай ғана білім бәсекесі емес, жүректен шыққан ықыластың, елге деген құрметтің көрінісі болды. Әскери бөлім сахнасы сол күні ерекше рухқа бөленді. Қатысушылар мемлекеттік тілде өлең оқып, көркем сөз сөйлеп, ән айтып, өз өнерлерін ортаға салды. Әрбір сөз анық, әрбір ой нық айтылды. Тіл арқылы елге қызмет етуге дайын азаматтардың бейнесі көрінді.
Сайыстың әділ әрі жоғары деңгейде өтуіне қазылар алқасы зор үлес қосты. Төрелік еткендер қатарында Алатау қаласының мәдениет, тілдерді дамыту, дене шынықтыру және спорт бөлімінің басшысы Шайкенова Бибигуль Кенжеханқызы, Алатау қалалық “Тіл” оқу-әдістемелік филиалы басшысы Қасым Таңшолпан Қасымқызы, Қонаев қалалық кітапханасы басшысы Актанова Айгүл Бегімбаевна және аталған кітапхананың басшы орынбасары Дәулетова Айдана Нүсіпханқызы болды. Қазылар әр қатысушының тіл тазалығына, сөз саптау мәнеріне, сахна мәдениетіне және мазмұн байлығына ерекше назар аударды.
Байқау қорытындысы бойынша жүлделі орындар иегерлері анықталды.
I орынды аға лейтенант Вяльцев Алихан Евгеньевич иеленді. Оның сахнадағы сенімділігі мен мемлекеттік тілде еркін сөйлеуі қазылар алқасының жоғары бағасына ие болды.
II орынды аға лейтенант Аркинжан Данияр Бахтиярұлы жеңіп алды.
III орын аға сержант Химушкин Вячеслав Николаевичке бұйырды.
Жеңімпаздар мен барлық қатысушыларға бөлім командирінің атынан дипломдар, алғыс хаттар және бағалы сыйлықтар табысталды. Бұл марапаттар тек жеңіс белгісі ғана емес, тілге деген құрметтің айғағы іспетті болды.
Айта кету керек, I орын иегері аға лейтенант Вяльцев Алихан Евгеньевич алдағы қыркүйек айында өтетін “Мемлекеттік тіл – менің тілім” байқауының қорытынды кезеңіне жолдама алды. Бұл – үлкен жауапкершілік әрі зор сенім.
Іс шараның сәнін келтірген тағы бір ерекше сәт – Сүйінбай атындағы Алматы облыстық филармониясы өнерпаздарының концерттік бағдарламасы болды. Әншілер мен бишілер өз өнерлерін ұсынып, әскери қызметшілер мен қонақтарға көтеріңкі көңіл күй сыйлады. Ән мен би тілдің рухын толықтырып, кештің мазмұнын байыта түсті.
Бұл байқау мемлекеттік тілдің беделін арттыруға, әскери ортада қазақ тілін қолдану аясын кеңейтуге және әрбір әскери қызметшінің тіл үйренуге деген ынтасын нығайтуға бағытталған маңызды қадам болды. Тіл – ұлттың тірегі десек, сол тіректі нығайту жолында 6654 әскери бөлімінің ұжымы нақты іспен үлгі көрсетіп келеді.
Мемлекеттік тілге құрмет – Отанға құрмет. Ал Отан қорғаушысының жүрегінде елге деген сүйіспеншілік пен тілге деген тағзым қатар тұратыны осы байқауда тағы бір мәрте дәлелденді.
