Адами қасиеттің төресі әрі әлеуметтік жауапкершіліктің жарқын үлгісі – айналаңа қамқор болып, қайырым қылу. Өз еркіңмен елге жақсылық жасап, игі істе ерікті болу. Дәл осындай қырынан танылып, көптің сауабын алып жүрген Есік гуманитарлық-экономикалық колледжінің ұжымы мен студенттері Халықаралық қатерлі ісікке шалдыққан балалар күніне орай өткен қайырымдылық жәрмеңкесіне қатысып, игі іске өз үлестерін қосып қайтты.
Қазақстанда жыл сайын 500-600 баладан қатерлі ісік анықталады екен. Ал қатерлі дерттің дауасы – уақыт оздырмай, оны ерте анықтау, дер кезінде шара қолдану. Сондай-ақ уақытылы ем алса, балалар обыры емделетінін ел білуі керек. Осы шындықты халыққа жеткізу әрі қайырымдылық жәрмеңкесін ұйымдастырып, Түркістан облыстық балалар ауруханасының онкогематология бөлімшесі жанынан аурухана қабырғасындағы Smart School мектебін ашуға қаражат жинау мақсатында Алматы қаласында ауқымды іс-шара өтті.
«Human Rights Lawyers» қоғамдық қоры, «Help Today» қоры, Әсел Байсейітова атындағы ABF қорлары бірлесе ұйымдастырған қайырымдылық жәрмеңкесіне Есік гуманитарлық-экономикалық колледжінің «Шебер қолдар» және «Этнодизайн» үйірмелерінің жетекшілері Жансая Жақыпбай мен Мадина Тоққожаева студенттерімен бірге қатысты. Олар өздері жасаған қолөнер бұйымдарын, әшекейлер мен кәдесый, ойыншықтарын жәрмеңкеге қойып, одан түскен қаржыны қайырымдылық қорына аударды. Сонымен қатар аталған игі іске колледждің еріктілер клубының мүшелері, сондай-ақ психолог-мамандары – Ж.Хабаева мен К.Құрманжан, жастар ұйымының президенті – Ернұр Нұрахмет, «Human Rights Lawyers» волонтерлік клубының мүшелігіне енген оқытушылар белсенді қатысып, өз үлестерін қосты.
«Еріктілердің қоғамдық іске белсене араласып, әлеуметтік жауапкершіліктің жарқын үлгісін танытып жүргені қуантады. Колледж студенттері – еріктілер аудандағы халықаралық волонтерлер жылының ашылуында да тыс қалмай, бастан-аяқ қатысып, мейірім мен жанашырлықтың маңызын айшықтай түсті. Салтанатты жиында Есік гуманитарлық-экономикалық колледжінің ерікті студенттері өз қолдарымен жасаған бұйымдарын көпшілік назарына ұсынып, шеберлік сағатын өткізді. Әрбір туынды тек еңбек емес, жүректен шыққан жылу мен шынайы ниеттің көрінісі болды. Жақсылық жасау – жүректің ісі», – дейді волонтерлікті қарбалас жұмысымен қатар атқарып жүрген психолог-маман Жеңісгүл Хабаева.
Расымен де, «Күш – бірлікте» деген бірауыз сөздің мағынасына мән беріп, игі істе күш біріктіре алсақ, ұлы мақсатқа жетелейтін үлкен өзгеріс өзімізден басталары анық.
Құралай Мұратқызы
Еңбекшіқазақ ауданы
