Өткен жылы ғана пайдалануға берілген Ұмтыл ауылдық округіне қарасты Алмалыбақ ауылындағы жайлы орта мектепте оқу жылы басталған алғашқы күннен-ақ көңіл аударарлық көптеген іс-шара халық назарын аударып үлгерді. Жайлы мектеп, аты айтып тұрғандай, сапалы білім, саналы тәрбие берудің басты бағыттарын қарастырып, оқушылардың қабілет-қарымын арттыру жолында жасап жатқан шығармашылық ізденістері өмір талабына сайма-сай келеді. Оған көлденең тартар дәлеліміз де бар.
Алмалыбақ ауылындағы жайлы мектеп биыл жақсы істің жанашыры болып отыр. Атап айтқанда, Қарасай ауданы ғана емес, облыс мектептері арасында бірінші болып «Мектеп LAFE» атты апталық мектеп газетінің алғашқы санын жарыққа шығарды. «Келісіп пішкен тон келте болмас» дегендей, мектеп ұжымы маңызы жоғары бұл мәселені кеңінен ойластырып, берік байлам жасаған. Журнал форматы үлгісіндегі 28 беттен тұратын мектеп газеті өзіндік көркемдігімен, мән беретіндей мәселелерімен бірден баурап алады. Мұнда басылымға байланысты бар талаптар қатаң ескерілген.
Газеттің алдына қойған мақсаты да айқын. Ол – мектептің апталық өмірін, оқу-тәрбие үдерісін, жаңалықтары мен жетістіктерін оқушыларға, педагогтер мен ата-аналарға жүйелі түрде таныстырып отыру арқылы мектеп қоғамындағы ақпараттық ашықтықты қамтамасыз ету, оқушылардың танымдылық белсенділігін арттыру, мектеп өміріне деген қызығушылығын күшейте түсу әрі оқушылардың журналистика мамандығына қарай бетбұрыс жасауына ықпал ету.
Расында да апталық газеттің мектептің айнасы екеніне анық көзіміз жетті. Ондағы арнайы айдарлармен берілген мақалалардың көтеріп тұрған жүгі де салмақты. Мұндағы жайлы мектеп директоры Жанар Әбдірахманованың осы газетке арнап шын жүректен шығарған өлеңі көп жайларды айтқызбай-ақ аңғартады. Газеттің редакциялық құрамы да мықтылардан жинақталған. Жоба жетекшісі, педагог-ұйымдастырушы – Жәния Сейілханқызы, бас редактор, ағылшын тілі пәні мұғалімі – Құралай Әбуқызы, тілші – Айғаным Серікқызы, фототілші – Мұхамет Қатранұлы, дизайнер – Нұрәли Мұратұлы.
Апталық газеттің алғашқы санының тұсаукесер рәсімі де салтанатты жағдайда өтті. Ұмтыл ауылдық ардагерлер ұйымының төрағасы, биология ғылымдарының докторы, профессор, академик Әйіп Ысқақов бастаған ақсақалдар газеттің тұсауын кесіп, редакция алқасына сәттілік тіледі. Ендігі жерде газет әр аптада шығып тұратын болады.
Қанат ТӘКЕБАЕВ
Алмалыбақ ауылы,
Қарасай ауданы
