Сүмбе ауылының тұрғыны Көпжасарова Өрлесін апамыз – жылдар бойы денсаулық сақтау саласында еңбек етіп, құрметті демалысқа шыққан жан. Зейнетке шыққан соң да бірнеше жыл осы салада еңбек етті. Ел арасында «1000 баланың анасы» атанды. Қарадала жұртшылығы Өрлесін апайдың орасан зор еңбегін әлі күнге айтып отырады. Күн-түн демей ана мен бала денсаулығы үшін тер төккен абзал жанның бүгін туған күні екен. Апайымыз туған күніне қарамастан өз ауылындағы референдум учаскесіне келіп, таңдауын жасап, дауыс берді.
«Мен үшін қашанда ана мен бала денсаулығы бірінші орында тұрады. Зейнетке шықсам да өмірімнің мәні болған медицина саласы туралы жылт еткен жақсы жаңалық болса құлағымды түре қаламын. Жаңа Ата Заңымыз да ел денсаулығының кепілі болады деп сенемін. Әрі сол үшін дауысымды бердім. Ұрпақ саулығы – ұлттың саулығы. Демек біз ел үшін жасалған әр игі істің қолдаушысы болсақ, елдігіміз де, бірлігімз де бекем болмақ. Сондықтан туған күнім болса келіп, таңдау жасадым», – дейді Өрлесін апай.
Апамызға №898 референдум учаскесінің комиссия мүшелері кішігірім сый-сияпат табыстады. Дәл бүгін 73 жасқа толған Өрлесін апамыз жастарға батасын да берді. Референдумның сәтті өтіп, ел іші аман болуын тіледі.
Анар Дүйсенбайқызы
Ұйғыр ауданы
