«Әділетті және Прогрессивті Қазақстанның Халықтық Конституциясы үшін!» жалпыұлттық коалициясының өкілдері Жамбыл ауданындағы ауыл-ауылды аралап, жұртшылықпен кездесу өткізіп жүр. Парламент Сенатының депутаты Жанболат Жөргенбаев бастаған коалиция мүшелері аудан орталығы Ұзынағаш ауылында орналасқан «АЛАТАУ» тігін цехына барып, еңбек ұжымымен жүздесті.
Жұмысшылармен кездесу барысында жаңа Конституция жобасы талқыланды. Аталған коалиция мүшелері жаңа Ата Заңның негізгі ерекшеліктері – адамды ең жоғары құндылық ретінде бекіту, әлеуметтік кепілдіктерді сақтау, еңбек құқықтарын қорғау, цифрлық қауіпсіздік, дәстүрлі отбасы құндылықтарын нығайту мәселелеріне жан-жақты тоқталды. Сондай-ақ, билік тармақтарының теңгерімі, бір палаталы Парламент құру, Вице-Президент институтын енгізу сияқты саяси жаңашылдықтар туралы түсіндірілді.
«Жаңа Конституция – еліміздің тұрақты дамуының берік негізі. Бұл – тек заңдар жинағы емес, біздің ортақ болашағымыздың айнасы», – деді Парламент Сенатының депутаты Жанболат Жөргенбаев.
Конституция жобасын талқылау кезінде еңбек адамдары өз сұрақтарын қойып, оған толыққанды жауап алды. Кездесу соңында «АЛАТАУ» тігін цехының ұжымы атынан коалиция өкілдеріне алғыс білдіріліп, референдумға белсене қатысуға дайын екендіктері жеткізілді.
Серік САТЫБАЛДИЕВ,
Жамбыл ауданы
