«Әділетті және прогрессивті Қазақстанның халықтық Конституциясы үшін!» жалпыұлттық коалициясының мүшелері Жамбыл ауданындағы ең шалғай орналасқан Үлкен ауылына барып, тұрғындарымен кездесті.
Кездесуде жаңа Конституция жобасындағы меншік пен табиғи ресурстарға қатысты нормалар талқыланды. Атап айтқанда, 8-баптың 3-тармағына сәйкес жер және оның қойнауы, су көздері, өсімдіктер мен жануарлар дүниесі, өзге де табиғи ресурстар халыққа тиесілі екені атап өтілді.
Коалиция мүшесі Юрий Шейкин бұл норманың маңызын кеңінен түсіндірді: «Жер – бұл жай экономикалық ресурс емес, ұлттық байлық. Қазақстан Конституциясының жаңа редакциясында табиғи ресурстардың халыққа тиесілі екені нақты бекітіледі. Бұл – стратегиялық маңызы бар норма. Ол жер мен байлықтың ел мүддесіне қызмет етуін конституциялық деңгейде айқындайды. Ауыл тұрғындары үшін бұл – жер қатынастарының құқықтық негізінің айқын әрі әділетті болуына кепілдік», – деді ол.
Тұрғындар кездесуге белсенді қатысып, өздерінің ұсыныс-пікірлерін білдірді. Айта кетсек, Үлкен ауылы аудан орталығы Ұзынағаштан 350шақырымдай қашық орналасқан. Балқаш көлініңжағасындағы елдімекен тұрғындары негізінен балық шаруашылығын басты кәсіп еткен. Еліміздегі тұңғыш АЭС-ті осында салу көзделіп отырғаны белгілі. Мұнда қазір инфрақұрылымды жақсарту мақсатындағы жұмыстар қарқынды жүргізілуде. Өткен жылы ауылішілік жолдар жөнделіп, бірнеше көше жаңартылды. Жаңадан ауылдық амбулатория ғимараты бой көтерді. Басқа да маңызды нысандардың құрылысы жоспарланған.
Серік Сатыбалдиев
Жамбыл ауданы
