Бүгін республикалық референдум күні Алматы облысының аудандары мен қалаларында түрлі жәрмеңкелер ұйымдастырылуда. Еңбекшіқазақ ауданындағы ұста шебері Даркембай Шоқпарұлы атындағы қолданбалы өнер музейінің қызметкерлері туған жері Ақши ауылында дауыс беру учаскелеріне келген жерлестер үшін көрме-жәрмеңке ұйымдастырды.
Айта кету керек, бұл игі іс бірте-бірте ұрпақтарды біріктіретін және осындай маңызды оқиғаларға ерекше сән беретін жақсы дәстүрге айналып келеді. Көрмеде халық шеберлері қазақтың ағаштан жасалатын ыдыстары, ұлттық киімдер, қамшы, музыкалық аспаптар мен әшекей бұйымдарын жасау сияқты көне қолөнер түрлерін таныстырып, өз жұмыстарын ұсынып, шеберлік сабақтарын өткізді.
Қолданбалы өнер музейінің директоры Дәулет Шоқпаровтың айтуынша, мұндай іс-шаралар ауыл тұрғындарының қызығушылығын арттырады.
— Біз адамдарға маңызды мәселеге қатысты өз пікірін білдіруге мүмкіндік беріп қана қоймай, оларға жағымды әрі шабыт сыйлайтын атмосфера қалыптастыруды мақсат еттік. Көрме-жәрмеңкеде жерлестеріміз өнер туындыларын тамашалап қана қоймай, олардың авторларымен әңгімелесіп, бұйымдардың жасалу барысымен де таныса алады. Менің ойымша, мұндай шаралар ауданның мәдени ортасын дамытуға және адамдарды біріктіруге ықпал етеді, — деді Дәулет Шоқпаров.
Оның пікірін белгілі зергер қыз Сәтен Райыс та қолдайды.
— Ұлы Дала мәдениеті әрқашан тәуелсіздік рухымен, еркіндікпен және асқақтықпен ерекшеленіп келген. Мұны қазақтың ұлттық әшекей бұйымдары да айқын көрсетеді.
Біз, ата-баба мұрасын сақтаушылар, референдум күні көрме-жәрмеңке ұйымдастыру бастамасын зор ықыласпен қолдадық. Өйткені өз тамырын, шыққан тегін білетін адам болашағын сенімді түрде айқындай алады. Осындай ел тағдыры шешілетін маңызды күні ұлттық дәстүрлерімізді сақтап, дамытып, үлкен сұранысқа ие бірегей бұйымдар жасап отырғанымыздың өзі де ерекше мәнге ие, — дейді Сәтен Райыс.
Айта кетейік, жергілікті тұрғындар қолөнершілердің бұл бастамасын жоғары бағалады.
— Бүгін біз тек еліміздің болашағы үшін дауыс беріп қана қоймай, жерлестеріміздің талантына да куә болып отырмыз. Бұл мәдениет пен азаматтық белсенділікті ұштастыратын тамаша мүмкіндік, — дейді ауыл тұрғындары.
P.S. Жалпы, Еңбекшіқазақ ауданындағы референдум учаскелерінде өткен сәндік-қолданбалы өнер көрме-жәрмеңкесі маңызды қоғамдық шараларды мәдени бастамалармен үйлестірудің жарқын үлгісіне айналды. Мұның арқасында дауыс беру процесі барлық қатысушылар үшін мазмұнды әрі қызықты өтті.
