Жамбыл ауданының Беріктас ауылында Ұлыстың ұлы күні мерекесіне орай Наурызнаманың онкүндігі аясында Ынтымақ күні аталып өтті. Округ әкімдігі мен мәдениет қызметкерлерінің ұйымдастыруымен ауылдық Мәдениет үйінде «Наурыз – ынтымақ пен бірлік берекесі» атты мерекелік іс-шара өтті. Ауыл тұрғындары 250 орынды көрермен залына мерекелік көңіл-күйде жиналды. Салтанатты шарада Беріктас ауылдық округі әкімі Сандуғаш Молдағалықова құттықтау сөз сөйлеп, ауылдық қоғамдық кеңес төрағасы Жанбол Өмірзақов көпшілікке бата берді. Шараға сондай-ақ ауылдық ақсақалдар кеңесінің төрағасы Дүйсен Жолдасбеков, аналар кеңесінің төрайымы Майгүл Жамашева қатысты. Осындағы «Асыл аналар» ансамблі мен ауыл өнерпаздары өнер көрсетіп, ән-жырдан шашу шашты. Мәдениет үйінің жанындағы қолөнер үйірмесінің жетекшісі Алмагүл Әбікей, Беріктас орта мектебі мен балабақша қызметкерлерінің ұйымдастыруымен қолдан жасалған бұйымдардан көрме қойылды. Тұрғындар шараға белсенді қатысып, дәстүрлі тағам ұсынылды.
«Мерекелік шараны өткізудегі мақсатымыз – қазақ халқының ұлттық салт-дәстүрлерін көрсету арқылы Наурыз мерекесінің мән-маңызын түсіндіру, ауыл тұрғындарының ынтымағын, татулық-бірлігін нығайту, үлкенге құрмет, кішіге ізет көрсету арқылы ұлттық құндылықтарды насихаттау», – дейді Беріктас ауылдық округінің әкімі Сандуғаш Талдыбекқызы.
Серік САТЫБАЛДИЕВ
Жамбыл ауданы
