Қонаев қаласының орталық алаңында 500-ден астам дрон әуеде қалықтап, түрлі бейнемен безендірілген аспан көрермен көңіліне ерекше әсер сыйлады. Әсіресе «15 наурыз – референдум», «Жаңа Конституция» жазулары елімізде болып жатқан саяси науқанның маңызын айқындап, жиналған жұрттың жауапкершілігін оятты.
Ұлттық болмыс ерекшелігінен сыр шерткен Қазақстан картасы, шаңырақ, Наурыз мерекесімен құттықтау жазбасы да көрерменнің патриоттық сезімін арттырды. Шараға облыс әкімінің орынбасары Ғани Майлыбаев, коалиция мүшелері, зиялы қауым өкілдері, қала тұрғындары мен қонақтары қатысты.
– Ұлт ерекшелігімен айшықталған дрон-шоу ерекше әсер сыйлады. Эмоциядан бөлек, Жаңа Конституцияның маңызын түсіндірді. Ел тағдыры шешілетін күні әрбір азамат дауыс беріп, атсалысуы тиіс, – деді облыстық қоғамдық кеңес төрағасы Қазыбек Дәуітәлиев.
– Халқымыз үлкен тарихи кезеңнен өтіп жатыр. Бұл – егемендік алғалы қабылданғалы жатқан үшінші Ата Заң. Осы уақытқа дейін қолданылған Конституция өз миссиясын орындады. Қазір бүкіл әлем, қоғам дамып, жаңа сипатқа еніп жатыр. Соған байланысты еліміздегі басты құжатқа да өзгеріс керек. Оның үстіне саяси науқан қасиетті ораза айына, Наурыз мерекесіне тұспа-тұс келуде. Дрон-шоу саяси науқанның мәнін халыққа ерекше форматта түсіндіргендей болды. Ұйымдастырушыларға алғысым шексіз, – деді облыстық ардагерлер кеңесінің төрағасы Ерболат Тұрымбетов.
Дрон-шоу аяқталғаннан кейін жиналған қауым әуезді әнмен өрілген концертті тамашалады.
