Жамбыл ауданының Еңбекшіарал ауылында Наурыз мерекесінде дәрігерлік амбулатория іске қосылды. Ұлыстың ұлы күні мерекесінде пайдалануға берілген аса маңызды медициналық нысанның ашылуы – ел игілігі жолындағы тағы бір маңызды қадам саналады.
Салтанатты шараға облыс әкімінің орынбасары Ғани Майлыбаев қатысып, облыс басшысы Марат Сұлтанғазиевтің құттықтауын жеткізді. Нысанның ашылуына сондай-ақ аудан әкімі Нұрлан Ертас, облыстық денсаулық сақтау және өзге де басқармалардың жетекшілері, аймақтың белгілі адамдары, медицина қызметкерлері және ауыл тұрғындары қатысты. Құрылысты жүргізген мердігер мекеме – «Техно Снаб 2002» ЖШС-нің учаске бастығы Әділет Адамбаев ғимараттың нышан кілтін ауылдық амбулатория меңгерушісі Гүлғайша Өмірәлиеваға тапсырды. Нысанның лентасы қиылып, Ғани Айдарұлы бастаған құрметті қонақтар ішін аралап көрді. Мекеме қажетті медициналық құралдармен жабдықталып, жұмыс істеуге барынша қолайлы жағдай жасалған.
Қарасу ауылдық округіне қарасты Еңбекшіарал ауылында бой көтерген дәрігерлік амбулатория ғимараты «Ауыл – Ел бесігі» мемлекеттік бағдарламасы аясында салынған. Бұл бағдарлама ауылдық елдімекендердің әлеуметтік инфрақұрылымын дамытуға және тұрғындарға медициналық көмектің қолжетімділігін арттыруға бағытталған. Нысанның құрылыс-монтаж жұмыстары мемлекеттік сатып алу келісімшартына сәйкес жүргізіліп, толықтай аяқталды.
Жаңа амбулаторияның іске қосылуы ауыл тұрғындарының сапалы медициналық көмекке қолжетімділігін арттырып, жергілікті халықтың денсаулығын нығайтуға үлкен мүмкіндік береді.
Серік САТЫБАЛДИЕВ
Жамбыл ауданы
