«Таза Қазақстан» жалпыұлттық экологиялық бағдарламасы аясында Есік қаласында кең ауқымды сенбілік ұйымдастырылды. Қала тұрғындарын ортақ іске жұмылдырған бұл шараға шамамен 3000-ға жуық адам белсене қатысты. Олардың қатарында мемлекеттік мекеме қызметкерлері, еріктілер, жастар және қала тұрғындары болды.
Сенбілік барысында қаланың көшелері, саябақтар мен қоғамдық орындар қоқыстан тазартылып, қоршаған ортаны көркейту жұмыстары жүргізілді. Нәтижесінде 4 тоннаға жуық қоқыс жиналып, арнайы орындарға шығарылды. Бұл – тұрғындардың табиғатқа деген жауапкершілігінің айқын көрінісі.
Сонымен қатар экологиялық ахуалды жақсарту мақсатында 400 түп ағаш отырғызылды. Жас көшеттер қаланың әртүрлі бөліктеріне егілді. Болашақта бұл жас көшеттер жайқалып өсіп, Есік қаласының көркін кіргізері сөзсіз.
Ұйымдастырушылардың айтуынша, мұндай шаралар тек тазалықты сақтауға ғана емес, қоғамда экологиялық мәдениетті қалыптастыруға да үлкен үлес қосады. Сенбілікке қатысқан әрбір тұрғын туған жердің тазалығы мен көркеюіне өз үлесін қосты.
«Таза Қазақстан» бағдарламасы аясында өткізілген бұл игі бастама алдағы уақытта да жалғасын табады.
Құралай МҰРАТҚЫЗЫ
Еңбекшіқазақ ауданы
