Қарадаладағы Наурыз тойы орталық алаңда өтті. Аудан орталығы Шонжыдағы алаңда қарақұрым халықтың саны көп болды. Ұлттық киім киген әжелер мен аталар немере-шөбересін ертіп алған. Қыз-келіншектер де ұлттық киім киіп, мереке көркіне көрік қосқан. Алаңды айнала тігілген ақшаңқан қазақ үйлер нағыз тойдың, ұлы тойдың болғанынан хабар бергендей. Мерекеге сай безендірілген алаңда наурыз-көже беріліп, сары қымыз сапырылып, қазан-қазан ет асылып, әрбір келген қонаққа дәм ұсынылып жатты. Осы көріністер Наурыз берекенің мерекесі екенін аңғартты.
Алаңда мерекелік шара бастау алды. Жер әлемнің түрленіп, жасыл желекке боянып, бар тіршілік оянғанынан сауын айтып, сүйіншілеген дауыстар елді елең еткізді. Осылайша, «Нұр себеле, Ұлыстың ұлы күні!» атты мерекелік шара басталып кетті. Ұлтымыздың мерейін өсіріп, күн мен түнді теңестіріп, көктем шуағын төгіп, қыстың көбесін сөгіп, тіршілік атаулыға жан бітіріп, табиғат әлемді көкке орап, көңілдерге ән, жүректерге жыр сыйлап келген Ұлыстың ұлы күнінде қазақтың дарабоз ақыны Жамбыл мен атағы алты Алашқа мәлім дауылпаз ақын Құлмамбеттің жыр додасы халыққа ұсынылды. Ынтымақ пен пен бірлікті жырлаған қос ақынның додасынан кейін Қыдыр атамыздың ақ батасын алдық. Әжелеріміздің ақ шашуын ханталапайлап таладық. Артынша сахнаға бүлдіршіндеріміз шықты. Олардың мың бұрала билеген билері де, әуелете шырқаған әндері де елдің мерейін одан сайын үстем етті.
Аудан әкімі Бота Елеусізова құттықтау сөз сөйлеп, дүйім жұртқа ақжарма тілегін арнады. Ұлыстың ұлы күнімен құттықтап, еліміздің амандығын тіледі. «Ұлы даламызда сан ғасырлар бойы тойланып, атадан балаға мұра болып келе жатқан ұлық мереке – Наурыз. Күн мен түннің теңелетін осынау ерекше күнін – жаңару мен жасарудың нышаны, дүниеге көрік берген шырайлы жыл басы деп құрметтеп, береке-бірліктің, теңдіктің, жақсы тілеудің, қайта түлеудің тойы ретінде дәріптеген», – дей келе Бота Серікқызы Мемлекет басшысының бастамасымен елімізде жүзеге асып жатқан Наурызнама онкүндігінің Шонжы өңірінде де жоғары деңгейде өтіп жатқанын айта кетті. Наурызнама аясында қайырымдылық шаралары жүзеге асып, тал-терек отырғызылып, нағыз жаңарудың мерекесін атап өтіп жатқанымызды да сөз етті. Бірқатар азаматқа марапаттар да табысталды.
Наурыз – табиғат атаулының тiрiлiп, өмiрге жаңа құлшыныспен қадам басатын шағы. Сонымен қоса ерте кезден-ақ бұл мейрам елдiң бiрлiгiн сақтап, татулыққа шақыратын ерекше сипатқа ие. Бұған тағы бір мәрте көз жеткіздік. Бір-бірін мерекемен құттықтап, қуаныштарын ас та төк дастарқанға салған ағайынның барлығы киіз үйлерде жайылған дастарқаннан ас ауыз тигізіп жатты. Ынтымақ, бірліктің нышанын көрсетті. Ортада қазақтың ұлттық ойындары да ойнатылып жатты. Осылайша, Наурыз мерекесін Қарадала халқы кең көлемде атап өтті.
Анар ДҮЙСЕНБАЙҚЫЗЫ
Ұйғыр ауданы
