Шарын ауылындағы референдум учаскелерінде жұмыс қызу жүруде. Қай жағынан болса да алдыңғы орыннан көрінетін бұл ауылдың тұрғындары бүгінгі науқанға да белсенді қатысуда. Әсіресе қазына қарттар ерекше ынта-ықыласпен учаскелерге келіп болашақ үшін таңдауларын жасауда.
Референдум учаскесіне келген Күләйхан Медетова апамыз 94 жасты алқымдаған. Күләйхан апамыз жасының келгеніне қарамастан мұндай саяси науқаннан қалыс қалуға болмайтынын да айтып қалды. «Бұл – еліміздің ертеңі үшін таңдау. Бұл – болашық ұрпағымыздың жақсы күндерде өмір сүруіне кепіл. Конституция – әр азаматтың құқығын ғана қорғап қоймай, осы мемлекеттің толыққанды азаматы ретінде өмір сүруіне кепіл болатын басты құжат. Ал біз сондай құнды дүниеге таңдау жасарда бей-жай қарамауымыз керек. Мықты Ата Заң – мықты ел. Сондықтан әркім өз таңдауын жасауы керек», – дейді қария.
97 жасты еңсерген Тохтихан Сабирова да өз таңдауын жасады. «Мен мемлекетіміздің, оның басында отырған президентіміздің әр бастамасына мұқият зер саламын. Жасым келді, дәуренім өтті деп ойламаймын. Мені ұл-қызымның, немере-шөберелерімнің болашағы алаңдатады. Біз талай қиындықты көрдік. Ал қазір менің балаларым білімді, заңмен қорғалған ортада өмір сүруде. Осының өзі зор қуаныш мен үшін. Өз өміріңді өзгенің қолына тапсырғың келмесе, таңдау жасау керек. Мен өзім ғана емес, әр баламның, жасы 18-ге толған немерелерімнің барлығының дауыс беруін таптап айтып отырамын», – деп ағынан жарылды. Әрі өз таңдауын жасады.
Шарын ауылында сегіз апамыз бен екі атамыз тоқсанды алқымдаған қазына қарттар. Кейбіріне комиссия мүшелері үйлеріне де барып, таңдауларын жасатты. Олардың барлығы да бүгінгі тарихи күнде таңдау жасағандарына ерекше қуанышты.
Анар Дүйсенбайқызы
Ұйғыр ауданы
