«Есік» музей-қорығында Еңбекшіқазақ ауданы Қаратума қорымының №48 обасынан табылған, біздің заманымызға дейінгі III-II ғасырларға тән екі дана білезік сақталған. Әшекейлер қоладан құйылып жасалған. Ұштары тұйықталмаған жарты шеңбер болып келеді. Беті зеңжармен жабылған. Ұзындығы – 6,5 см, ені – 5,3 см, сымның көлденең қимасының диаметрі – 0,3 см.
Білезікті ерте көшпелілер қола, алтын, күміс сынды металдар мен сүйектерді өңдеп жасаған. Халық ұғымында сәндік көркемдігімен қатар, діни ғұрыптық наным-сенім бойынша білезік тіл-көзден қорғайды деп есептелген. Ғалым, этнограф, зерттеуші Зира Наурызбайдың деректеріне сүйенсек, әшекей ағзаның қорғаныс күштерін нығайтып, жүйке жүйесін қалпына келтіруге, буын ауруларының алдын алуға ықпал етеді.
Қорыта келе, көне заманнан тамыр тартатын зергерлік өнерімізді бабалардан қалған өнеге мен аманат ретінде бағалап, ұлттық эстетикалық мұрамызды келер ұрпаққа жеткізу – бәріміздің ортақ парызымыз.
Нұргүл Мүкеева,
Есік мемлекеттік тарихи-мәдени музей-қорығының қызметкері
