Жамбыл ауданының Мәтібұлақ ауылдық округінде Ұлыстың ұлы күні жоғары деңгейде ұйымдастырылды. Бұл күні Мәтібұлақ ауылындағы Мәдениет үйінің алдындағы алаңда «Наурыз – ынтымақ пен бірлік берекесі» атты мереке өтті.
Жиналған көпшілікті аталған округтің әкімі Мадияр Мұқашев мерекемен құттықтап, бұл іс-шараның басты мақсаты – қазақ халқының бай мәдени мұрасын, салт-дәстүрін дәріптеу, ауыл тұрғындарының бірлігін нығайту және ұлттық құндылықтарды кеңінен насихаттау екенін атап өтті. Мерекелік шара барысында ауыл өнерпаздары ән мен жырдан шашу шашып, көрерменге көтеріңкі көңіл-күй сыйлады. Сонымен қатар, ұлттық ойындар ұйымдастырылып, оған тұрғындар белсенді қатысып, ерекше әсер алды. Қонақтарға қазақтың дәстүрлі тағамдары ұсынылып, мерекенің ажары одан әрі айшықтала түсті. Бұл игі шара ауыл тұрғындарының ауызбіршілігін арттырып, Наурыз мейрамының басты құндылықтары – татулық, мейірімділік пен жаңаруды кеңінен насихаттауға оң ықпалын тигізді. Мерекені ұйымдастыруға округ әкімшілігі мен Мәдениет үйінің қызметкерлері, сонымен бірге ауылдың беделді азаматтары, жастар, шаруа қожалықтарының иелері, кәсіпкерлер, жалпы тұрғындар атсалысты.
«Наурыз – тек мереке ғана емес, ол халықты жақындастыратын, ізгілікке бастайтын ерекше күн екені тағы бір мәрте дәлелденді», дейді мәдени шараның басы-қасында жүрген Мәтібұлақ ауылдық Мәдениет үйінің директоры Темірхан Мүкеев.
Мәтібұлақта «Ұлыстың ұлы күні құтты болсын! Береке мен бірлік әр шаңыраққа орнасын!» деген тілектер молынан айтылды.
Серік САТЫБАЛДИЕВ
Жамбыл ауданы
