Бүгінгі референдумда аудандық мәдениет үйінің қызметкерлері дауыс беру учаскелеріндегі тұрғындарға ерекше көңіл-күй сыйлады.
Аудандық мәдениет үйіне қарасты «Жазерке», «Арзу» ансамбльдері мен Қарадала халық театрының өнерпаздары аудан орталығы Шонжы ауылындағы референдум учаскелеріне барып, дәстүрлі әндерден шырқап, ерекше әсерге бөледі. Аудандық мәдениет үйінің директоры Салтанат Ешмұханбетова: «Алдымызда ұлыстың ұлы күні наурыз мерекесі келе жатыр. Онымен мұсылман қауымның қасиеті ораза айы да тұспа-тұс келіп отыр. Осы қос мерекемен қатар болып жатқан саяси науқанды еліміздің тарихындағы ерекше күн ретінде есте қалсын деген ниетпен мәдениет үйінің өнерпаздары бастамасымен дауыс беру учаскелеріне барып халық әндерін шырқап, жарапазан айтып келеміз. Бұл дәстүрімізді жаңғырту, салтымызды сақтаудың да бір белгісі. Өнер ұжымының ұл-қыздары өздері бекітілген ччаскелерде дауыстарын да беріп келеді кезегімен», – деп бүгінгі референдумның маңызын жүрегімен сезініп, өнердің тілімен дәріптеген өнер ұжымдарының белсенділігі жоғары екенін айтты.
Ұлттық киімдерін киіп, қазақ пен ұйғырдың ұлттық аспаптарымен шырқалған әндерге риза көңілмен қарағандар да, тіпті бірге ән айтып, би билеген тұрғындар да кездесті. Қай дауыс беру учаскесіне бармасын, аудан өнерпаздарын тұрғындар ерекше қабылдап, көтеріңкі көңілмен қайтып жатты.
Анар Дүйсенбайқызы
Ұйғыр ауданы
