«Сәлем беру шеруі» акциясы өтті

Райымбек ауданының Нарынқол,Текес, Жамбыл, Қарасаз ауылдарында республикалық референдум құрметіне «Сәлем беру шеруі» атты тағылымы мол, тәрбиелік мәні зор акция ұйымдастырылды. Шараға ақ кимешекті әжелер мен ақ жаулықты аналар қатысты.
Акцияның мақсаты– саяси оқиғаның маңызын насихаттап, мәртебесін арттыру болса, екінші жағынан ұлттық салт-дәстүрді жас ұрпақтың бойына сіңіру, үлгі-өнегесін қалыптастыру. Акция барысында аналар көше бойымен референдум учаскесіне дейін шерулетіп, ұлттық рухымызды асқақтататын халықтық әндерді орындады. Туған жер мен елге, Отанға деген сүйіспеншілік, сыйластық, бауырмалдық, ізеттілік, мейірімділік, басқа да адами құндылықтарды жан-жақты насихаттауға барынша мүдделілік танытты. Референдум учакесіне шерулетіп келіп, лайықты таңдауларын жасады. Ақ кимешек, ақ жаулықты әжелер мен аналар ғасырдан-ғасырға жалғасып келе жатқан аналық асыл қасиеттің, жылы жүрегі мен аялы алақанының қадір-қасиетін, дүниетанымын бейнелеу арқылы көрсетті.
Жаңа Конституцияның жобасына қатысты республикалық референдум құрметіне арналған «Сәлем беру шеруі» – бір күндік акция ғана емес, ұлттық тәрбиенің мектебін жаңғыртқан тағылымды шара болды. Осындай игі бастамалар арқылы ұлттық рух жаңғырып, жас ұрпақ жүрегінде адамгершілік қасиет берік ұялайтыны ақиқат.
Жұмабек Тәліпұлы
Райымбек ауданы