Қонаев қаласындағы №933 учаскеде өтіп жатқан жаңа Конституцияны қабылдауға арналған референдумда облыстық Ауған ардагерлері одағының атынан байқаушы ретінде қатысудамын. Өзіме жүктелген міндетті атқару мақсатында Қаламқас Дәулетқызы төрағалық ететін референдум учаскесіне сағат 6:00 де келдім. Мұнда ұйымдастыру деңгейі өте жоғары. Тізім бойынша 938 адам дауыс беруі тиіс. Қазіргі кезде оның 600-ге жуығы келіп таңдауын жасады. Учаскеге бекітілген шағынаудан тұрғындары саяси науқанға белсене қатысуда. Таңертеңгі уақытта әскерилер, полиция және басқа мекемелердің қызметкерлері дауыс берді. Түске таман егде жастағы адамдар қарасы молайды. Түскі мезгілде саябырсығанымен, қазіргі кезде келушілер қатары қайтадан көбейіп келеді.
Дауыс беру барысы талапқа сай өткізілуде. Ешқандай заңбұзушылық болған жоқ. Ешбір дау-жанжал туындамай, «Бір дауыс – бір бюллетень» қағидасына сай өтуде. Бұрынғы кезде жұбайының немесе жақын туысының орнына дауыс бергісі келетіндер болушы еді. Бұл жолы ондайды кездестірмедік. Олар бюллетень алып, кабина ішіне бір-бірлеп кіріп, өз таңдауларын жасауда. Дауыс беруге келушілердің барлығының бірдей өте тәртіпті екенін көріп, тәнті болып отырмын.
Бахытбек ДАВЛЕТОВ,
байқаушы
