Кеген ауданындағы референдум учаскелері мүмкіндігі шектеулі азаматтардың да таңдау жасауына қолайлы етіп жасақталған. Көру және есту қабілеті нашар азаматтар үшін жаңа Конституция жобасының аудио және брайль қарпі түрінде жазылған нұсқалары бар. Бұл еліміздегі барлық сайлау учаскесінде болады. Денсаулығына байланысты келе алмайтынын сайлаушыларға референдум кезінде комиссия мүшелері олардың үйіне арнайы барады. Мүмкіндігі шектеулі жандар елдегі саяси өзгерістерге үн қосып, қоғамдық жұмыстарға белсене араласып келеді. Сондықтан да саяси науқан кезінде олардың дауыс беруі үшін бар мүмкіндікті жасауымыз қажет. Ғимарат алдындағы пандустар талапқа сай, әрі көру қабілеті нашар адамдар үшін еденге жолбағдар орнатылған. Бүгінгі референдумда мүмкіндігі шектеулі жандар өз таңдауын жасауда,- дейді Алматы облыстық Жұмыспен қамтуды үйлестіру және әлеуметтік бағдарламалар басқармасы басшысының орынбасары Байқоныс Ержан Ділданұлы.
Республикалық референдум кезінде барлық учаскеде мүгедектігі бар адамдарға арналған арнайы бұрыштар болады. Бұл бұрышқа арнайы компьютер, ұлғайтқыш құралдар, құлаққаптар және өзге де құрылғылар қойылады.
Сондай-ақ, ауданда инватакси қызметі ұйымдастырылған.
Осы орайда, үйден арнаулы әлеуметтік қызмет алушы Нағима Таласбаеваның пікірін білген едік.
– Бүгін үйге келген сайлау жәшігі, мен үшін ерекше әсер қалдырды. Үйде дауыс беретін адам ретінде менің даусымның қаншалықты маңызды екенін байқатты. Әрбір азаматтың пікірі мемлекет үшін құнды, ал менің ойым мен таңдауым да елдің болашағына әсер етеді. Жаңа Конституция әрбір адамның құқығын қорғауға бағытталғанын көрсетеді. Сондықтан өз пікірімді ашық айту және дауыс беру -менің борышым ғана емес, сонымен бірге қуанышты парызым. Ел дамуы- әрбіріміздің белсенділігімізге байланысты дейді,- Нағима Таласбаева.
Дәурен ӘБУТӘЛІПОВ
Кеген ауданы
