Кеген аудандық Мәдениет үйінде Алғыс айту күніне орай «Бейбітшілік бастауы – бірлік пен келісім» атты салтанатты шара өтті. Сахна шымылдығы еліміздің татулығын айшықтайтын әсерлі бейнеүзіндімен ашылды.
Жиналған көпшілікті мерекемен құттықтаған Кеген ауданының әкімі Нұрбақыт Теңізбаев өңірдің, жалпы еліміздің дамуына үлес қосып жүрген жерлестерінің еңбегі өлшеусіз екенін атап өтті.
– Басынан небір зұлмат пен зобалаңды өткеріп, тағдырдың талай тәлкегіне төтеп берген халқымыз бүгінде бірлігі жарасқан, берекелі ғұмыр кешіп келеді. Осындай бейбіт күнге жету жолында татулық пен ынтымақты ту еткен елдің ауызбіршілігі – ең үлкен байлығымыз. Қазақ халқы ежелден ұрпағын үлкенді құрметтеуге, ақсақалдың батасын алып, алғысын арқалауға тәрбиелеген. «Алтын алма, алғыс ал», «Жауынмен жер көгерер, батамен ел көгерер» деген тағылымды сөздер – соның айғағы. Халқымыз үшін алғыс пен бата – тек ізгі тілек емес, ұрпақ санасына сіңген өмірлік ұстаным, адамгершіліктің асыл қағидасы. Сондықтан әрдайым бір-бірімізге жүрегіміздің жылуын сыйлап, қиын сәтте қолдау көрсетіп, қуанышта бірге шаттана білейік. Ынтымақ пен сыйластық салтанат құрған жерде ғана береке мен бақ орнайды! – деген аудан басшысы бірқатар азаматты Алғыс хатпен марапаттады.
Шара барысында Кеген аудандық ардагерлер кеңесінің төрағасы Шыңғыс Тұрсынов, аудандық жастар ресурстық орталығының жетекшісі Аслан Мерғалиұлы сөз алып, ыстық ықыластарын білдірді.
Салтанатты жиын соңында аудан өнерпаздары ән мен жырдан шашу шашып, мерекенің шырайын аша түсті.
Дәурен ӘБУТӘЛІПОВ
Кеген ауданы
