Наурызнама аясында 18 наурыз – Ұлттық киім күні ретінде тойланады. Осыған орай Талғар ауданы Тұздыбастау ауылдық Мәдениет үйінде «Алатау әуендері» ансамблінің ұйымдастыруымен мерекелік кеш өтті.
Шараның ашылу салтанатында өнерпаздар ұжымы сахнаға ұлттық киіммен шығып, «Қамажай» биін орындады. Мәдениет үйінің директоры Мұратбек Сарбасов жиналған жұртты құттықтап, жылы лебізін білдірді.
– Бүгін біз нағыз халықтық мереке – Ұлттық киім күнін атап өтудеміз. Бұл ата-бабаларымызды еске алуға, ұлттық мұраға деген қызығушылықты арттыруға және жастар арасында этностильді дәріптеуге зор ықпал етеді. Қазақтың ұлттық киімі бай және алуан түрлі. Ол өткеннің белгісі ғана емес, сонымен бірге рухани құндылықтардың құрамдас бөлігі, бүгінгі мәдени және заманауи бірегейліктің нышаны, – деді ол.
Аудан өнерпаздары ұлттық мерекелерге қатысты киім түрлерін таныстырды. Көрген жанның көзін сүйіндіретін ұлттық киім киген қыздар әшекейлер мен ою-өрнектері бар тұрмыстық үй жабдықтарын да көпшілікке ұсынды. Шара барысында «Алатау әуендері» ансамблі ән-күй орындап, ақындар өмірінен сахналық көрініс қойды.
Ұлттық киімнің әрбір элементі – әшекейдің, кестенің, ою-өрнектің өзіндік мәні бар. Ол тек тарихтың ғана емес, сонымен бірге заманауи Қазақстанның да маңызды бір бөлігі. Өйткені ұлттық киім – ұлт бейнесі.
Құтмағамбет ҚОНЫСБАЙ
