Алматы облысында 3 мыңнан астам бала қызылшаға қарсы екпе алды

Ұлттық күнтізбеге сәйкес екпе егу – халық денсаулығын қорғаудың ең тиімді жолдарының бірі. Қазақстанда міндетті екпелер мемлекет тарапынан тегін жүргізіліп, әр баланың туған сәтінен бастап белгілі бір мерзімдерге сай салынады. Бұл жайында Алматы облысы санитариялық-эпидемиологиялық бақылау департаменті басшысының орынбасары Сәулет Қапсаламова мен облыстық Денсаулық сақтау басқармасы басшысының орынбасары Лейла Серікбаева айтты.
Тегін жүргізілетін екпелердің қатарына туберкулез, «А» және «В» вирустық гепатиттері, дифтерия, көкжөтел, сіреспе, полиомиелит, қызылша, қызамық, эпидемиялық паротит, b типіндегі гемофилді инфекция, пневмококк инфекциясы және адам папиллома вирусына қарсы екпелер жатады. Бұл екпелер қауіпті жұқпалы аурулардың алдын алуға бағытталған.
Екпе тек балалар үшін ғана емес, ересектер үшін де маңызды. Белгілі бір жас кезеңдерінде қайта егу жүргізіліп, ағзаның қорғаныш қабілеті сақталады. Сонымен қатар медицина қызметкерлері мен қауіп тобына жататын адамдар да міндетті түрде екпе алады.
Екпе алу алдында дәрігердің тексеруі, пациенттің келісімі және екпеден кейінгі бақылау – қауіпсіздіктің негізгі талаптары. Бұл шаралар жағымсыз әсерлердің алдын алуға мүмкіндік береді.
«Жыл сайын сәуір айының соңында өтетін Иммундаудың дүниежүзілік апталығы екпенің маңызын еске салады. Екпелер соңғы 50 жылда миллиондаған адамның өмірін сақтап қалды. Соған қарамастан, әлемде әлі де екпе алмаған балалар саны көп, ал жалған ақпарат екпеге деген сенімге кері әсер етуде» – деп атап өтті Сәулет Қапсаламова.
Бүгінде өңірде 6–11 айлық балаларды қосымша иммундау жұмыстары басталды. Жалпы 11 480 бала екпе алуы тиіс болса, оның 8 390-ы екпе алып үлгерді. Сонымен қатар қайта иммундау аясында 18 жасқа дейінгі 3003 бала қызылшаға қарсы екпе алды.
«Ұлттық профилактикалық екпелер күнтізбесіне сәйкес, облыста 318 егу пункті мен 76 жылжымалы бригада жұмыс істейді. Сондай-ақ 36 алғашқы медициналық-санитариялық көмек ұйымының 33-інде егу жұмыстары жүргізілуде» – деп қорытты Лейла Серікбаева.
Жалпы, қоғамда екпеге сенімді арттыру және әр адамды жауапкершілікке шақыру – бүгінгі күннің басты міндеттерінің бірі. Егу арқылы біз өзімізді ғана емес, болашақ ұрпақты да қорғаймыз.