Қарасай аудандық аналар кеңесі ұйымы Астана қаласында өтетін «Жаңа Қазақстан» республикалық инновациялық орталығының қоғамдағы ана мәртебесін арттыру, отбасы институтын нығайту, ұрпақ тәрбиесінде ананың атқаратын маңызды рөлін насихаттау мақсатында ұйымдастырған «Аяулы ана» және «Инабатты келін» республикалық байқауына өңірдегі аналарды қатыстыруға игі бастама көтеріп, ықпал жасаған болатын. Бұл бастаманы Қаскелең қалалық және ауылдық әкімдіктері де қызу қолдады. Осы мақсатта Қарасай ауданынан 3 ана Астана қаласына аттанған еді.
Атап айтқанда, олар – О.Жандосов ауылынан көпбалалы ана, осындағы орта мектеп директорының тәрбие ісі жөніндегі орынбасары әрі орыс тілі мен әдебиеті пәнінің мұғалімі Анара Өміржанова, Қаскелең қаласынан көпбалалы ана, Күміс және Алтын алқа иегері, зейнеткер-ұстаз Гүлсім Қыбыраева, Көкөзек ауылындағы орта мектептің музыка пәнінің мұғалімі Аяулым Тұрғанзинова. Байқау қорытындысында қарасайлық аналардың бағы жанып, жұлдыздары жарқырады. Анара Өміржанова, Гүлсім Қыбыраева байқау жеңімпазы атанып, бала тәрбиесіне қосқан айрықша еңбегі үшін «Аяулы ана» орденімен, I дәрежелі дипломмен және «Аяулы ана» статуэткасымен марапатталса, «Инабатты келін» байқауына қатысқан Аяулым Тұрғанзинова да сый-сияпатсыз қалмады. Ол І дәрежелі дипломмен және «Инабатты келін» төсбелгісін алып қайтты. Сөйтіп, Астана қаласынан аналарымыз абыройлары асқақтап, олжалы оралды. Олардың осы байқауға қатысуға демеушілік жасаған Қарасай аудандық аналар кеңесінің төрағасы Әзиза Найымбаева бастаған ұйым мүшелеріне және аудан, қала, ауыл әкімдіктеріне айтар алғыстары шексіз. Аудан аналарына мінсіз қызмет етіп жүрген аналар кеңесі ұйымының төрағасы Әзиза Найымбаева да «Жаңа Қазақстан» республикалық инновациялық орталығының Алғыс хатымен марапатталды. Осылайша, Әзиза Ахметқызының да еңбегі еленіп, лайықты бағасын алды. «Жақсылықтың ерте-кеші жоқ» деген – осы. Аналар қуанышы ортаймасын деп тілейміз.
Клара ШӘРІПХАНҚЫЗЫ,
Қарасай аудандық аналар кеңесінің мүшесі
