Іле ауданында «Таза Қазақстан» экологиялық акциясы аясында кезекті сенбілік ұйымдастырылды. Тазалық шарасына аудан әкімі орынбасары Мұхамедғаріп Құрманғалиев қатысып, «Galanz bottlers» компаниясының ұжымымен бірге аумақты абаттандыру жұмыстарына атсалысты.
Аталған мекемеден 200-ге жуық адам сенбілікке шығып, тазалық жұмыстарын жүргізуге белсенді үлес қосты. Қатысушылар аумақты қоқыстан тазартып, қоршаған ортаны көркейтуге бағытталған жұмыстарды жүзеге асырды.
Аудан әкімі орынбасары Мұхамедғаріп Құрманғалиев өз сөзінде:
«Бүгін біз “Galanz bottlers” компаниясымен бірге сенбілікке қатысып отырмыз. Қуантатыны — бизнес өкілдері мұндай бастамаларға бейжай қарамай, белсенді қолдау көрсетуде. Аталған мекемеден 200-ге жуық адам шығып, тазалық жұмыстарына үлес қосты. “Таза Қазақстан” — бұл бір күндік акция емес, бұл — тазалық мәдениеті», — деп атап өтті.
Айта кету керек, Іле ауданында «Таза Қазақстан» акциясы аясындағы жұмыстар жүйелі түрде жалғасып келеді. Бұл — бизнестің әлеуметтік жауапкершілігі мен туған жерге деген жанашырлығының нақты көрінісі.
