Алматы облысы әкімінің бірінші орынбасары Қанат Есболатов Қонаев қаласындағы бірқатар нысанды аралады. Ең алдымен ол «Көшпенділер қалашығына» барды. Мұнда ол келушілердің көбеюіне байланысты қауіпсіздік шараларын күшейтуді, санитарлық-эпидемиологиялық талаптарын сақтай отырып, жұмыс істеуді, полиция пункті мен медициналық пункт орналастыруды тапсырды.
Содан кейін Қанат Есболатов солтүстік жағалауға барып, жедел-құтқару жасағының жұмысымен танысты. Төтенше жағдай қызметкерлерінің сөзінше, материалдық-техникалық база толығымен жаңартылған: түнде ұшуға арналған дрондар, су көліктері, сүңгуірлерге арналған жабдықтардың барлығы бар. Қазіргі таңда ЖАО тарапынан қосымша гидроскутерлер сатып алу мәселесі қарастырылуда.
Сондай-ақ солтүстік жағалаудағы коммуналдық жағажай жаңғыртылады деп жоспарлануда. Облыс әкімінің орынбасары жобамен танысып, жауапты мамандарға жақын арада құрылыс жұмыстарын бастауды тапсырды. Бұдан бөлек, ол №6,7 жағажайларға да ат басын бұрды. Қазір мұнда құрылыс қарқын алған. Жобаға сәйкес, жағажайда көше жарығы бағаналары ауыстырылып, бейнебақылау камералары, қоқыс жәшіктері, ойын алаңдары, санитарлық тораптар, шағын бизнес орындары, шатырлар орнатылады, инженерлік желілер де жаңартылады.
