«Өмірдің ең алыс және қараңғы жолдарыда жарық беретін шамға» іспеттес болған кітаптарды сақтап, насихаттап жүрген Жаңыл Оразбайқызы келешек ұрпақты тәрбиелеу жолында адалдықтың ақ жүгін арқалап келеді. Кітапханашы қарапайым мамандық дер біреулер. Кез келген көзі ашық, көкірегі ояу тұлға өз ұрпағына жан-жақты тәрбие беруде кітапханаға, оның ішінде кітапханашыға жүгінері сөзсіз.
Осы тұрғыда әр оқырманға мына күйбең тіршіліктен бір мезетке шығып, басқа бір әлемді табуға өз көмегін беріп жүрген Жаңыл Нәшірбекованы өз ісінің маманы десек болады. Оқырманның рухани баюына, саналы ұрпақ легінің қалыптасуына зор үлес қосып жүрген мықты маманның қалай қалыптасқандығын оның еңбек жолынан аңғаруға болады. Ол Еңбекшіқазақ ауданының Қаракемер ауылдық кітапханасында 2003 жылдан бері табан аудармай еңбек етіп келді. Жаңыл Оразбайқызы еңбек жолын бастаған күннен-ақ ауыл кітапханасының жұмысын жандандыруға ерекше үлес қосты. Кітап қорын насихаттау, оқырман санын арттыру, түрлі мәдени-танымдық іс-шараларды ұйымдастыру арқылы ол ауыл тұрғындарының рухани өміріне серпін беріп отыр. Әсіресе жас ұрпақты кітап оқуға баулу, олардың ой-өрісін кеңейту бағытындағы еңбегі зор.
Жылдар бойғы тынымсыз еңбегі мен кәсіби шеберлігінің арқасында ол көптеген марапаттарға ие болды. Соның ішінде 2021 жылы «Қазақстанның құрметті кітапханашысы» медалімен марапатталуы – оның еңбегіне берілген жоғары баға. Бұл марапат – тек жеке жетістік қана емес, ауыл кітапханасының да абыройын арттырған маңызды оқиға.
Қаракемер ауылдық кітапханасы бүгінде оқырман үшін тек кітап алатын орын ғана емес, рухани ортаға айналып отыр. Бұл – Жаңыл Оразбайқызы сынды өз ісіне жан-тәнімен берілген мамандардың еңбегінің нәтижесі. Оның еңбегі – кейінгі жас буынға үлгі, ал кітапқа деген сүйіспеншілігі – мәңгілік құндылық.
Бақытгүл Тұрғынбаева
