Жол қызметі мамандары жоспарлы бақылау барысында «Кеген – Нарынқол» республикалық автомобиль жолының 20-шақырымында еріген қар суы ағысының күшейгенін уақытылы анықтады. Алматы облысы әкімдігі баспасөз қызметінің хабарлауынша, қосымша тексеру барысында тас жолдағы су өткізу құбыры бүлініп, жиналған су жолды шайып кеткені анықталды.
Айта кету керек, бұл тасжол 1960-1970 жылдары салынған. 50 жылдан астам уақыт көлік қатынап келеді. Осы уақытқа дейін аталған учаскеде жолдың шайылуы немесе еріген су көлемінің күрт ұлғаюы тіркелмеген. Сондықтан бұл аймақ бұрын тасқын қаупі бар деп есептелмеген.
Уақытылы қабылданған шаралардың арқасында жол қозғалысы дереу тоқтатылып, қауіпсіздік шаралары қамтамасыз етілді. Қазіргі уақытта апат орнында арнайы техника жұмыс істеп жатыр. Дереу арада көлік қатынасын тоқтатпау үшін уақытша жол салынды.
Әкімдік су өткізу құбыры мен бүлінген жол жабындысы еріген су ағысы азайған соң қалпына келтірілетінін хабарлады. Сонымен қатар, аталған учаскеде орташа жөндеу жұмыстарын жүргізу мердігер ұйымға тапсырылды. Жұмыс барысында зақымданған жол бөлігі қалпына келтіріліп, жол инфрақұрылымының табиғи апаттарға төзімділігін арттыру шаралары іске асырылады.
Жағдай тұрақты бақылауда.
