Жазғы маусымда Қарасай ауданының орталығында жаңа саябақ ашылады. Енді Қаскелең өзенінің бойы көрікті орынға айналмақ. Сонымен қатар мұнда спортпен шынығатын және балалар ойнайтын алаңдар салынады.
Саябақтың сәнін келтіретін осы және өзге де жұмыстардың жай-жапсарын білу бізге де қызық болды. Ол жайлы толық ақпарат алу үшін Қаскелең қаласы әкімінің орынбасары Рустам Атшабаровпен тілдесіп көрдік.
Саябақ алаңы Тәуелсіздіктің 10 жылдығы көшесінің бойына белгіленген. Оның жалпы көлемі – 3,5 гектар.
Қаскелең қаласы әкімінің орынбасары Рустам Әмірғалиұлының айтуынша, саябақ алаңын екіге бөлу қарастырылған. Бірі – тынығу алаңы, екіншісі – серуендеу.
– Саябақтың күншығыс аумағы белсенді қозғалысқа арналған. Яғни бұл жақта амфитеатр, воркаут, спорт және балалар алаңы болады. Ал екінші жағында халықтың тынығуына жағдай жасалады. Мұнда демалу үшін 70 орындық орнатылып, серуендеу үшін жаяу жүргіншілер жолағы салынады. Сондай-ақ адамдардың қауіпсіздігі ескеріліп, түнгі жарықтандыру мен бейнебақылау камералары іске қосылады, – деді Рустам Атшабаров.
Саябақтың құрылысына жауапты мердігер мекеме анықталған. Жоспар бойынша осы айдың соңына дейін жұмыс басталып, маусым айында аяқталуы тиіс.
Қаскелең қаласының көрікті жеріне айналатын саябақты халық талайдан бері күткен еді. Ел тілегі ескерілген бұл жарқын жоба алдағы уақытта ойдағыдай жүзеге асады деген сенімдеміз.
Дидар МӘЛІКҰЛЫ
Қарасай ауданы
